Leit­in að rjúpna­skytt­unni aust­ur á Héraði sem staðið hef­ur yfir síðan á föstudagskvöld hef­ur enn eng­an ár­ang­ur borið. Leit hefst aftur af fullum krafti nú þegar birta tekur.

Lágmarksleit fór fram í nótt en samkvæmt upplýsingum frá Þorsteini G. Gunnarssyni, upplýsingafulltrúa Slysavarnafélagsins Landsbjargar, voru um 30 manns úti á leitarsvæðinu í nótt með ljós. Aðaltilgangurinn með því var að gera sig sýnilega ef ske kynni að einhver hreyfing væri á þeim týnda.

Stjórnendur leitarinnar fóru yfir stöðuna í nótt og skipulögðu leit dagsins. „Við gerum ráð fyrir því að með morgninum verði um og yfir 200 manns úti við leit. Alls hafa um 440 björgunarsveitarmenn komið að leitinni á einn eða annan hátt,“ segir Þorsteinn.

„Áfram verður aðaláherslan lögð á leitarsvæði frá því að skyttan skildi við félaga sína og hélt til baka í átt að Einarsstöðum,“ segir Þorsteinn en björgunarsveitarmenn hafa leitað í hlíðinni frá Einarsstöðum í norður. „Þó að aðaláherslan sé þar þá verður einnig leitað á öðrum stöðum,“ bætir Þorsteinn við en vélsleðahópar leita til að mynda á öðrum stöðum.

Veðurútlit á leitarsvæðinu er mun betra en það var í gær en þá voru aðstæður til leitar erfiðar. Gert er ráð fyrir því að hægt verði að nota þyrluna mun meira við leitina í dag. Komin er hitamyndavél frá Akureyri en hún verður sett í þyrluna til að aðstoða við leitina.

Snjóflóðahætta á svæðinu var skoðuð í gærkvöldi og í nótt og var hún metin nokkur. „Leitarmenn eru meðvitaðir um það og haga leit samkvæmt því og hópar eru með snjóflóðaýlur og annað á sér,“ segir Þorsteinn.

Tengdar fréttir

Rjúpnaskyttu leitað 18.-20. nóv

„Ævilöng skuldbinding um að vera ábyrgari“

• Skipti sköpum að hafa hundinn
• Leit í erfiðum aðstæðum – myndskeið
• Rjúpnaskyttan fundin
• Áfram leitað að rjúpnaskyttunni í kvöld

» Fleiri tengdar fréttir

• Blogga um frétt