Lýst eftir týndum manni

Lögreglan á höfuðborgarsvæðinu lýsir eftir Ólafi Erni Arnarsyni en ekkert hefur heyrst frá honum eftir að hann fór frá heimili sínu í efri byggðum Kópavogs snemma í morgun. Ólafur er 34 ára gamall og er klæddur í dökkbláa úlpu, bláar gallabuxur, með mosabrúna húfu og í svörtum skóm.

Samkvæmt upplýsingum frá lögreglunni hafa björgunarsveitir meðal annars leitað að Ólafi í Heiðmörk nú í kvöld.

Í tilkynningu frá lögreglunni segir orðrétt:

„Lögreglan á höfuðborgarsvæðinu lýsir eftir Ólafi Erni Arnarsyni. Ólafur er 34 ára, rúmlega 190 cm á hæð, um 105 kg og sköllóttur. Hann er klæddur í dökkbláa Carhart-úlpu, bláar gallabuxur, með mosabrúna 66 gráður norður húfu og í svörtum skóm. Hann er líklega með rauðan bakpoka. Ólafur fór frá heimili sínu í efri byggðum Kópavogs snemma í morgun, miðvikudag, og ekkert hefur heyrst til hans síðan þá. Þeir sem geta gefið upplýsingar um ferðir Ólafs eru vinsamlegast beðnir um að hafa samband við lögreglu í síma 444-1000.“

Bætt við klukkan 06 að morgni 15. desember

Lögreglan sendi frá sér tilkynningu í nótt um að Ólafur Örn sé kominn fram heill á húfi.

• Blogga um frétt