Innlent | mbl | 14.12.2016 | 9:30 | Uppfært 10:00

Stúfur í Norður-Kóreu

Stúfur afhenti stílabækur í ýmsum löndum frá Íslendingum sem gáfu námsgögn sem sannar gjafir fyrir jólin í fyrra. Teikning/Brian Pilkington

„Menningin í Norður-Kóreu er býsna ólík þeirri íslensku,“ segir Stúfur. „En eitt eigum við þó sameiginlegt: Áhuga á góðum harmónikkuleik! Það kom mér skemmtilega á óvart að harmónikkan er vinsælasta hljóðfærið þar eystra. Það er nefnilega mitt uppáhaldshljóðfæri.“

Hann segir að sér hafi þó fundist hann ekki jafnfrjáls og heima á Íslandi. „Það eru engin böll í Norður-Kóreu, hvorki harmónikkuböll né jólaböll. Ég gat aldrei sleppt af mér beislinu og verið ég sjálfur. Manni hættir til að gleyma hvað maður hefur það gott að búa á Íslandi.“

Ljósmynd/UNICEF

Menntun öflugasta vopnið gegn fátækt

Menntun er eitt öflugasta vopnið gegn fátækt og hungri og því er hægt að kaupa námsgögn á sannargjafir.is sem hjálpa börnum víða um heim að æfa sig í að skrifa, teikna og reikna.

Stúfur afhenti stílabækur í ýmsum löndum frá Íslendingum sem gáfu námsgögn sem sannar gjafir fyrir jólin í fyrra, til dæmis Benín, Tsjad, Síle, Austur-Kongó, Króatíu, Kúbu, Kirgistan, Sádi-Arabíu, Suður-Afríku og Norður-Kóreu.

Fólk er hvatt til að hjálpa Stúfi að útvega enn fleiri námsgögn í ár – með því að gefa sanna gjöf hjá UNICEF. Það er líka aldrei að vita nema einhverjir krakkar fái sannar gjafir í skóinn sinn.

Ljósmynd/UNICEF

Nikkan aldrei langt undan

Íslensku jólasveinarnir eru þekktir fyrir stríðni og pretti. Þeir hafa hins vegar snúið við blaðinu og hjálpa nú UNICEF við að koma hinum ýmsu hjálpargögnum til barna í neyð. Fólk getur keypt gjöf sem bjargar lífi barna á vefsíðunni sannargjafir.is.

Til að leggja lóð sín á vogarskálarnar birtir mbl.is myndband með jólasveini dagsins á hverjum degi fram að jólum.

Stúfur hlakkar til að hitta hressa krakka í aðdraganda jólanna. Hann minnir á að hann verði á stjái um allt land og að nikkan sé sjaldnast langt undan. „Ef ég verð beðinn um að þenja nikkuna þegar ég er búinn að gefa í skóna mun ég ekki skorast undan,“ segir hann glaðbeittur.