Innlent | mbl | 21.12.2016 | 9:30 | Uppfært 10:57

Íslendingur í Nollywood-mynd

Á Íslandi fór fram vel heppnuð neyðarsöfnun og var jólasveinninn Gluggagægir fenginn til að flytja bóluefni til Nígeríu. Teikning/Brian Pilkington

UNICEF tók þátt í umfangsmiklu bólusetningarátaki í Nígeríu á dögunum. Bólusett var gegn mænusótt en unnið er að því að útrýma þessum skæða sjúkdómi á heimsvísu. Á Íslandi fór fram vel heppnuð neyðarsöfnun og var jólasveinninn Gluggagægir fenginn til að flytja bóluefni til Nígeríu.

„Ég var að fara þarna út með sjúkrakassa sem hægt er að kaupa á sannargjafir.is,“ segir Gluggagægir. „Mig munaði ekkert um að kippa bóluefninu með í leiðinni.“

Ljósmynd/UNICEF

Leikur 900 ára mann

Gluggagægir sat heldur betur ekki auðum höndum í Nígeríu og lét sig ekki muna um að leika í svokallaðri „Nollywood-mynd.“ Kvikmyndaiðnaður í Nígeríu er geysilega öflugur og er hann stundum kallaður Nollywood, en í landinu eru framleiddar fleiri myndir en í draumaverksmiðjunni Hollywood.

„Það kom einhver leikstjóri að máli við mig og réð mig í mynd sem hann var að gera. Honum fannst ég smellpassa í eitt hlutverkið,“ segir Gluggagægir.

Ljósmynd/UNICEF

– En um hvað er myndin?

„Myndin fjallar um ástarþríhyrning. Gifta konu sem verður ástfangin af síðskeggjuðum Evrópumanni sem er 900 ára gamall. Ég er þá að leika aðeins upp fyrir mig í aldri, en að öðru leyti hentaði hlutverkið mér nokkuð vel.“

– En gæti Gluggagægir hugsað sér að leika í fleiri myndum í Nollywood?

„Ég er alla vega til í að halda þeim glugga opnum,“ segir hann kíminn.

Ljósmynd/UNICEF

Íslensku jólasveinarnir eru þekktir fyrir stríðni og pretti. Þeir hafa hins vegar snúið við blaðinu og hjálpa nú UNICEF við að koma hinum ýmsu hjálpargögnum til barna í neyð. Fólk getur keypt gjöf sem bjargar lífi barna á vefsíðunni sannargjafir.is.

Til að leggja lóð sín á vogarskálarnar birtir mbl.is myndband með jólasveini dagsins á hverjum degi fram að jólum og fylgist með ferðum sveinanna um heiminn.

UNICEF, Barnahjálp Sameinuðu þjóðanna, berst fyrir réttindum allra barna og er í einstakri stöðu til að þrýsta á um breytingar á heimsvísu.