Talsverður ágreiningur kom upp á meðal verjenda og dómara við upphaf réttarhalda yfir þeim átta, sem ákærð eru fyrir umsvifamikil fjársvik. Snerust deilurnar um hvort aðalmeðferð, sem hefjast átti klukkan níu í morgun, væri í raun hafin. Henni hefur nú verið frestað.

Ástæða ágreiningsins var sú bókun, sem verjandi eins ákærða lagði fram strax í upphafi réttarhaldanna, um að einn þriggja dómara, Sandra Baldvinsdóttir, skyldi víkja sæti í málinu.

Frétt mbl.is: Einn þriggja dómara sagður vanhæfur

Mismunandi reglur gilda um möguleikann á að kæra ákvarðanir og úrskurði héraðsdóms til hæstaréttar, eftir því hvort aðalmeðferð sé hafin eða ekki.

Því vildu dómarar meina, að hún væri þegar hafin, meðal annars vegna þess að búið væri að taka nafnakall. Verjandinn sagði aftur á móti að hún hæfist ekki fyrr en sækjandinn gerði viðstöddum grein fyrir sakarefninu, sem hann hafði ekki gert.

Krafðist verjandinn þess þá að úrskurðað yrði um þetta, og að hann fengi að kæra úrskurðinn til Hæstaréttar, á meðan dómarar vildu að mótmæli hans yrðu bókuð, og svo haldið áfram með réttarhöldin.

Tvö hlé á aðeins hálftíma

Eftir stutt karp um þetta atriði ákváðu dómarar að taka sér annað hlé, sem þá voru orðin tvö á aðeins hálftíma.

Að því loknu sögðu dómararnir að fallist væri á sjónarmið verjandans, um að aðalmeðferðin væri ekki hafin.

Að minnsta kosti sex verjendur sögðust því þó ekki sammála. Hún hæfist í raun á hamarshöggi og nafnakalli. Hagsmunir skjólstæðinganna fælust í að halda málinu áfram, án frekari frestana. Eins og áður var getið kom málið upp árið 2010.

Kröfu verjandans, um að dómarinn viki sæti í málinu, var þá hafnað af dómendum. Var hann umsvifalaust kærður til Hæstaréttar.

Aðalmeðferð málsins hefur því verið frestað, eins og áður sagði.

Upphaf skiptir máli

• Skv. a-lið 1. mgr. 192. gr. sakamálalaga eru úrskurðir héraðsdómara, um hvort hann víki sæti í máli, kæranlegir til Hæstaréttar.
• Í 2. mgr. 192. gr. laganna er hins vegar fjallað um þá úrskurði héraðsdómara, eftir að aðalmeðferð er hafin, sem eru kæranlegir til hæstaréttar.
• Þar er ekki talað um úrskurði um hvort héraðsdómari eigi að víkja sæti í máli.
• Þess vegna, ef aðalmeðferð er hafin, er ekki hægt að kæra úrskurð héraðsdóms um að héraðsdómari sé ekki vanhæfur.
• Það er hins vegar hægt ef aðalmeðferð er ekki hafin.

Tengdar fréttir

Stóra skattsvikamálið

Sýknudómar í stóra skattsvikamálinu

• „Ómöguleg staða“ hjá embættunum
• Fangelsisdómar í stóra skattsvikamálinu
• Dómarinn ekki vanhæfur
• Dómari sagður vanhæfur

» Fleiri tengdar fréttir

• Blogga um frétt