Ákveðnar kirkjur safngripir Þjóðminjasafns

Kristín Huld Sigurðardóttir, forstöðumaður Minjastofnunar, er ekki ýkja hrifin af tillögu Viðskiptaráðs um að ríkið selji við vægu eða engu verði 22 kirkjur til þjóðkirkjunnar, sem aðallega eru á norðanverðu landinu og Vestfjörðum.

„Allar kirkjur á Íslandi, sem eru eldri en hundrað ára, eru friðaðar, þannig að það má vitanlega ekki gera hvað sem er við þær. Ýmsar kirkjur eru á friðlýsingarskrá og nokkrar kirkjur eru í Húsasafni Þjóðminjasafni og heyra þannig undir Þjóðminjasafnið og eru einfaldlega safngripir þess,“ segir Kristín Huld í umfjöllun um mál þetta í Morgunblaðinu í dag.

Eins og fram kom í Morgunblaðinu í gær er elsta kirkjan sem Viðskiptaráð vill að ríkið selji Grafarkirkja á Höfðaströnd, en hún er að stofni til frá árinu 1680. Næstelsta kirkjan er Hóladómkirkja, sem reist var á árunum 1757 til 1763. Flestar kirkjurnar eru frá öndverðri 19. öld.