Góð þátttaka í Veganúar

Átakið vegan janúar eða veganúar eins og það kallast líður brátt undir lok en lokahófið verður haldið á Gló í kvöld. Að sögn Sæunnar Ingibjargar Marínósdóttur, upplýsingafulltrúa Samtaka grænmetisæta á Íslandi, var þátttakan góð í ár.

„Þetta er búið að ganga mjög vel. Það er margt fólk búið að taka þátt og það er búin að vera mikil virkni í hópunum okkar og góð þátttaka í viðburðum,“ segir Sæunn.

„Við fengum í kringum 200 manns á kynningarfundinn okkar í byrjun janúar og svo var pálínuboð um miðjan janúar sem var vel sótt og góð stemning.“

Sæunn Ingibjörg Marínósdóttir er markaðsstjóri Gló og upplýsingafulltrúi Samtaka grænmetisæta á Íslandi Ljósmynd/Eydís Guðmundsdóttir

Sæunn segir margt nýtt fólk bætast í hópinn í janúar. „Það er mjög gaman að sjá hvað margir eru áhugasamir og vilja svolítið fara alla leið og gerast hluti af þessu vegan-samfélagi sem er að myndast hjá okkur á Íslandi.“

Veganuary, alþjóðlegi vegan-mánuðurinn, hefur verið haldinn fjórum sinnum. Samkvæmt könnun meðal skráðra þátttakenda á heimasíðu Veganuary árin 2015 og 2016 má ætla að um helmingur þeirra sem taka þátt í veganúar séu enn þá vegan hálfu ári síðar.

Engin tölfræði er til um hversu margir eru vegan eða grænmetisætur á Íslandi en Sæunn segir þó augljóst að talan hafi hækkað mikið á síðustu árum.

„Ég er markaðsstjóri Gló og var áður innkaupastjóri hjá Nettó og bara út af söluaukningu á vegan-vörum get ég fullyrt að fjöldinn hefur margfaldast á síðustu tveimur árum.“

Fyrir þá og þær sem hafa áhuga á að gerast vegan segir Sæunn einna mikilvægast að koma sér upp góðu stuðningsneti og vera óhræddur við að spyrja spurninga.

„Besta ráðið er bara að ganga í Facebook hópinn Vegan Ísland og vera virkur, koma á viðburði hjá okkur og kynnast aðeins öðrum sem eru í sömu sporum. Vera ófeimin(n) við að spyrja spurninga og leita ráða. Þetta er svo framandi fyrir marga, svo margt sem þarf að huga að og margt nýtt.“

• Blogga um frétt