Mikil uppbygging nýrra íbúða er í farvatninu í Hlíðunum í Reykjavík, samkvæmt drögum að húsnæðisáætlun Reykjavíkurborgar. Samtals verða íbúðirnar 1.725 talsins, flestar á Hlíðarenda.
Alls eru 905 íbúðir á byggingasvæðum á framkvæmdastigi, þar af 600 á Hlíðarenda. Þar verður meðalstærð íbúða 113 fermetrar.
Á reitnum Einholti-Þverholti rísa 203 íbúðir og verður meðalstærðin 120 fermetrar. Allar verða þær í eigu húsnæðisfélaga.
Samtals verða 103 nemendaíbúðir í Ásholti og þar verða íbúðirnar litlar, eða að meðaltali 45 fermetrar.
Íbúðir sem eru í samþykktu deiliskipulagi í Hlíðunum eru 400 talsins. Allar verða þær á reitnum Nauthólsvegi-Öskjuhlíð, þar sem gert er ráð fyrir að meðaltali 53 fermetra íbúðum fyrir almenning og stúdenta við Háskólann í Reykjavík.
160 íbúðir eru í formlegu skipulagsferli á KHÍ-reitnum við Stakkahlíð. Þar verða íbúðir fyrir almenning og stúdenta og verður meðalstærð þeirra 70 fermetrar.
Á Sjómannaskólareitnum eru nemendaíbúðir á þróunarsvæði í skoðun. Reiknað er með 120 íbúðum en ekkert kemur fram í húsnæðisáætluninni um stærð þeirra.
Á Veðurstofuhæð, sem er þróunarsvæði í skoðun, er jafnframt gert ráð fyrir 140 íbúðum.