„Menn eru að jafna sig á þessu og lífið er að færast í eðlilegt horf,“ segir Bryndís Kjartansdóttir, staðgengill sendiherra Íslands í Svíþjóð, spurð út í andrúmsloftið eftir hryðjuverkaárásina í Stokkhólmi á föstudag.

Minningarstund var haldin fyrr í dag fyrir utan ráðhúsið í borginni vegna þeirra fórnarlamba sem létust. Þar ávarpaði Stefan Löfven, forsætisráðherra Svíþjóðar, mannfjöldann. Þar að auki var mínútuþögn í landinu í morgun vegna fórnarlambanna.  Stór minningarstund var einnig haldin í gær við Drottningargötu þar sem voðaverkið var framið.

„Áherslan var lögð á að lífi skuli ganga sinn vanagang áfram,“ segir Bryndís um minningarathafnirnar.

Úsbekinn Rakhmati Akilov varð fjórum að bana í árásinni þegar hann ók inn í mannfjölda í borginni. Fimmtán særðust. 

Íslendingar vel upplýstir

Bryndís segir að eftir hryðjuverkaárásina hafi mikil áhersla verið lögð á það hjá sendiráðinu að upplýsa Íslendinga eins vel og mögulegt var um það sem hafði gerst. Öllum ábendingum frá lögreglu um hvar fólk ætti að halda sig var komið á framfæri, auk þess sem látið var vita um stöðuna á samgöngumálum en allar samgöngur fóru úr skorðum eftir árásina. Þær voru komnar í eðlilegt horf í gær.

Talið er að um tvö þúsund Íslendingar búi í Stokkhólmi. Þar að auki er borgin vinsæll ferðamannastaður á meðal Íslendinga. Eftir árásina hvatti sendiráðið Íslendinga í Stokkhólmi til að láta vita af sér. Bryndís segir að flestir hafi gert það í gegnum Facebook en hún hefur ekki tölu á því hversu margir létu vita af sér.

„Það voru Íslendingar þarna nálægt. Við höfum heyrt í þeim og fleirum,“ segir hún og staðfestir að engir Íslendingar hafi slasast í árásinni. „Það er meðal annars okkar hlutverk að kanna hvort Íslendingar skaðist þegar svona kemur upp. Það eru ákveðnar boðleiðir fyrir upplýsingar af því tagi.“