Jón Bjarki Bentsson, aðalhagfræðingur Íslandsbanka, segir hagstæð kjör á verðtryggðum lánum eiga þátt í hækkandi fasteignaverði.
„Það er auðveldara að standast greiðslumat á 40 ára verðtryggðu jafngreiðsluláni en á óverðtryggðu láni. Þetta hefur þau áhrif á markaði að fasteignaverð hækkar frekar en ella. Verðið hefði ekki hækkað jafn mikið ef fólk væri almennt að taka óverðtryggð lán með jöfnum afborgunum,“ segir Jón Bjarki.
Magnús Árni Skúlason, hagfræðingur og framkvæmdastjóri Reykjavík Economics, segir neytendur njóta góðs af aukinni samkeppni á íbúðalánamarkaði. Viðskiptakostnaður neytenda hafi lækkað og frelsi til að skipta milli lánsforma aukist.
Samkvæmt nýjum gögnum frá Seðlabanka Íslands stóðu verðtryggð lán til heimila, með veði í íbúð, í 1.208 milljörðum í lok mars. Til samanburðar voru heildarlán til heimila, með veði í íbúð, þá 1.430 milljarðar. Hlutdeild óverðtryggðra lána jókst á tímabili en því skeiði virðist lokið. 6