Tugir frá Icelandair mættu á fund hjá Wow
Setja bókamerki
„Í fljótu bragði sýnist mér að það hafi verið hátt í 150 manns á þessum fundi og ég get trúað því að af þeim hafi 70 til 80 verið flugmenn Icelandair sem vilja skoða hvað þessi vinnuveitandi hefur upp á að bjóða,“ segir Jóhann Óskar Borgþórsson, varaformaður Félags íslenska atvinnuflugmanna.
Greint var frá því á mbl.is að WOW air stæði fyrir opnum fundi fyrir flugmenn í dag þar sem starfsemi fyrirtækisins yrði kynnt fyrir mögulegum umsækjendum. Fundarboðið kom skömmu eftir að fjölda flugmanna Icelandair var sagt upp störfum og tugum flugstjóra tilkynnt að þeir yrðu færðir niður í stöðu flugmanns næsta vetur.
„Ég lít fyrst og fremst á það að menn séu þarna að lýsa yfir óánægju með starfsmannastefnu Icelandair gagnvart okkur flugmönnum. Ég held að ég tali fyrir flestalla þegar ég segi að þetta sé orðið pínlega leiðinlegt.“
Jóhann segir að kjörin sem WOW air kynnti á fundinum hefðu komið samstarfsmönnum sínum á óvart. „Í samtölum við kollega mína kom á óvart að þeir virðast vera að bjóða betri kjör en menn bjuggust við, menn voru ekki með miklar væntingar en nú get ég ekki dregið dul á það að menn horfa á þetta sem raunverulegan valkost.“
Laun segja ekki alla söguna
Þótt WOW air geti ekki jafnað Icelandair þegar kemur að útborguðum launum eru aðrir þættir sem vega upp á móti, sér í lagi árstíðarsveiflan, að sögn Jóhanns. Hann segist hafa fengið sex uppsagnarbréf og sagt upp fjórum sinnum á þeim ellefu árum sem hann hefur starfað hjá fyrirtækinu.
„Við erum ekki bara að velta fyrir okkur útborguðum launum, menn eru til dæmis að skuldbinda sig hjá Icelandair alla starfsævina, en það kom kollegum mínum á óvart að þetta er mjög nálægt því sem Icelandair er að bjóða.“
Hversdagslífið getur verið yndislegt
Síminn stoppar ekki hjá Árekstur.is
Varð að gefa dálítið af sjálfum mér
Viðreisn krefst aðildarviðræðna við ESB
„Það er sárt að svona fór“
Skrifaði fyrstu fréttina af hvarfi Geirfinns
Viðreisn gæti valið stjórn