Innlent | mbl | 8.7.2017 | 18:41 | Uppfært 9.7.2017 11:28

„Þurfum að fara yfir þetta frá A til Ö“

Sýni voru tekin í fjörunni við Faxaskjól í gær og fyrradag. mbl.is/Kristinn Magnússon

„Ég tel nauðsynlegt að við lærum af þessu,“ segir Halldór Halldórsson, oddviti Sjálfstæðismanna í Reykjavík, í samtali við mbl.is. Eins og áður hefur komið fram flæddu um 750 lítrar af skólpi í hafið á sekúndu við skólphreinsistöð við Faxaskjól áður en fjölmiðlar greindu frá biluninni.

Borgarstjórn er í sumarfríi nú um stundir en Halldór mun fara fram á að framkvæmd verði stjórnsýsluúttekt á málinu á næsta fundi borgarráðs, 20. júlí. „Við þurfum að fara yfir þetta mál frá A til Ö og fyrirbyggja að þetta gerist aftur,“ segir Halldór.

Halldór Halldórsson, oddviti Sjálfstæðismanna í borgarstjórn. mbl.is/Ómar

Hann bendir á að ekki ætti að líða jafnlangur tími og raun beri vitni í þessu máli áður en almenningur er látinn vita hvað er í gangi. Máli sínu til stuðnings vitnar Halldór í 10. grein laga um upplýsingarétt um umhverfismál.

Þar segir að stjórnvöldum sé ævinlega skylt að hafa frumkvæði að upplýsingagjöf sé ástæða til að ætla að frávik vegna mengandi efna í umhverfi geti haft í för með sér hættu eða skaðleg áhrif á umhverfi eða heilsu fólks eða dýra.

„Þess vegna þarf stjórnsýsluúttekt. Það getur vel verið að það vanti vitneskju um lögin og notkun þeirra. Það er auðvitað mjög alvarlegt.“