Ráðgert er að fyrsti hópurinn af erlendum skátum snúi aftur á Úlfljótsvatn í kvöld, eftir að 180 skátar voru fluttir þaðan í fjöldahjálparstöð í Hveragerði í kjölfar þess að nóró-sýking kom upp í hópnum.

Þetta kemur fram í tilkynningu frá Útilífsmiðstöð skáta við Úlfljótsvatn. Segir þar að upphaflega hafi staðið til að snúið yrði aftur á Úlfljótsvatn á morgun, sunnudag, en sótthreinsun á byggingum og annarri aðstöðu hafi farið fram í dag og í gær og gengið vel.

„Eftir samráð við Heilbrigðiseftirlit og sóttvarnalækni á Suðurlandi þótti því ekki ástæða til að bíða lengur með að snúa til baka, þó svo að unnið verði eftir varúðarráðstöfunum á meðan beðið er eftir niðurstöðum sýnatöku,“ er haft eftir Hermanni Sigurðssyni, framkvæmdastjóra Bandalags íslenskra skáta, í tilkynningunni.

„Til dæmis verður aðeins notað aðflutt flöskuvatn og farið eftir leiðbeiningum um ítarlegt hreinlæti, handþvott og þrif.“

Margir skátanna sem höfðu veikst voru útskrifaðir úr fjöldahjálparstöðinni í Hveragerði í dag og er nú unnið í því að koma öllum hópum fyrir á næturstað.

„Hver hópur fyrir sig mun svo fljúga til síns heima á næstu dögum eins og fyrri ferðaplön þeirra segja til um,“ segir Hermann.

Tengdar fréttir

Skátar fluttir í fjöldahjálparmiðstöð

Opið á Úlfljótsvatni

• Gestur bar veiruna með sér
• Síðustu skátarnir á leið heim
• Tíu með nóró-veiruna á Úlfljótsvatni
• Þrifum á Grunnskólanum í Hveragerði lokið

» Fleiri tengdar fréttir

• Blogga um frétt