Innlent | mbl | 6.10.2017 | 11:29 | Uppfært 11:53

„Verið dylgja um að ég hafi misnotað stöðu mína“

Bjarni Benediktsson skrifar langa færslu á Facebook vegna umfjöllunar stundarinnar. mbl.is/Kristinn Magnússon

Bjarni Benediktsson forsætisráðherra segir að öll viðskipti hans við Glitni banka hafi verið eðlileg og að þau hafi staðist ítrekaða skoðun. Þetta kemur fram í færslu sem hann birtir á Facebook-síðu sinni vegna umfjöllunar Stundarinnar þar sem fram kemur að hann Bjarni hafi selt sínar hjá Sjóði 9 hjá Glitni dagana 2. til 6. október 2008, en hann sat neyðarfund bankans þann 29. september sama ár. Í umfjöllun Stundarinnar segir að Bjarni hafi búið yfir innherjaupplýsingum um raunverulega stöðu bankans og fjármálakerfisins í heild.

Bjarni segir í færslunni að það sé rangt að hann hafi búið yfir trúnaðarupplýsingum um stöðu Glitnis og fjármálakerfisins. Verið sé að dylgja um að hann hafi misnotað stöðu sína og stundað innherjasvik.

„Eins og áður hefur komið fram seldi ég hlutabréf mín í Glitni árið 2008. Söluandvirðið var geymt áfram í bankanum, fyrst og fremst í Sjóði 9. Ég seldi smám saman þá eign yfir árið og færði að hluta í aðra sjóði og á innlánsreikninga hjá bankanum.

Látið er að því liggja í fréttum í dag að ég hafi búið yfir trúnaðarupplýsingum um stöðu fjármálakerfisins, eða Glitnis, annars vegar þegar ég seldi hlutabréfin, og hins vegar þegar ég seldi eftirstöðvar eignar minnar í Sjóði 9 dagana fyrir fall bankans. Þetta eru alvarlegar ásakanir. Hér er verið dylgja um að ég hafi misnotað stöðu mína og stundað innherjasvik. Hvort tveggja er rangt,“ skrifar Bjarni.

Engum gat dulist staða fjármálakerfisins

Hann fer yfir það að alþjóðleg fjármálakrísa hafi geisað árið 2008 og að Ísland hafi ekki farið varhluta af henni. Þá telur hann upp nokkur atriði sem skipta mestu máli þegar kemur að aðdraganda hruns íslenska fjármálakerfisins og viðskiptum sínum með hlutabréf í Glitni banka. Hann segir að engum hafi getað dulist að grafalvarleg staða var komin upp í íslenska fjármálakerfinu. Það hafi því verið almenn vitneskja frá því tilkynnt var um yfirtöku ríkisins á 75 prósenta hlut í Glitni, þann 29. septmber, og fram að setningu neyðarlaganna, þann 6. október sama ár, að markaðir á Íslandi voru í frjálsu falli.

„Í fyrsta lagi er rétt að vekja athygli á því að 29. september 2008 var tilkynnt að ríkið hygðist yfirtaka 75% í Glitni en tveimur vikum áður hafði Lehman Brothers bankinn fallið. Engum gat dulist að upp var komin grafalvarleg staða í íslenska fjármálakerfinu. Dagana frá yfirlýsingu um yfirtökuna og fram að setningu neyðarlaganna, 6. október, voru markaðir á Íslandi í frjálsu falli.

Í öðru lagi er það rangt að ég hafi beðið um sölu á hlut mínum sama dag og neyðarlögin voru sett, 6. október 2008. Hið rétta er að ég óskaði eftir því 2. október, eins og framkomin gögn sýna, en uppgjör tók 2-3 viðskiptadaga. Ég seldi í Sjóði 9 en keypti m.a. í sjóðum 5 og 7, sem voru áhættuminni og geymdi peningana áfram í bankanum.

Í þriðja lagi vil ég að fram komi að ég, líkt og margir aðrir viðskiptavinir bankans, var læstur í mörg ár með peninga í sjóði bankans.“

Þverktekur fyrir að hafa miðlað upplýsingum frá FME

Bjarni tekur jafnframt fyrir það í færslu sinni að hann hafi miðlað upplýsingum um störf Fjármálaeftirlitsins (FM) til starfsmanna Glitins. Í umfjöllun Stundarinnar kemur fram að þann 6. október 2008, hafi Einar Örn Ólafsson, framkvæmdastjóri fjárfestingabankasviðs Glitnis og vinur Bjarna, sent tölvupóst á aðstoðarmann Lárusar Welding, þáverandi bankastjóra Glitnis, með upplýsingum um það hvað væri að gerast hjá FME. Í umfjöllyn Stundarinnar segir að þennan dagi hafi FME verið að taka ákvörðun um hver framtíð Glitnis yrði og hvort raunhæft væri fyrir ríkið að efna hlutafjárloforðið frá 29. september eða ekki.

„Í fjórða lagi er látið að því liggja að ég hafi miðlað upplýsingum um störf Fjármálaeftirlitsins (FME) til starfsmanns bankans. Þetta á sér enga stoð í raunveruleikanum. Engum slíkum upplýsingum var miðlað enda bjó ég ekki yfir slíkum upplýsingum. Hins vegar mátti öllum vera ljóst að FME væri að vinna í málunum. Þetta er eftir að tilkynnt hafði verið um yfirtöku ríkisins á bankanum. Það hefði verið ábyrgðarlaust ef menn hefðu ekki verið að róa öllum árum að því að bjarga málum í FME á þessum tíma og ekkert fréttnæmt við að ég hafi mögulega látið slík orð falla,“ skrifar Bjarni.

Aldrei gerðar athugasemdir við viðskiptin

Þá segir hann aldrei hafa verið gerðar athugasemdir við viðskipti hans af hálfu slitastjórnar bankans, eða af hálfu Rannsóknarnefnd Alþingis.

„Í fimmta lagi liggur fyrir að Rannsóknarnefnd Alþingis (RNA) fékk víðtækustu rannsóknarheimildir sem mögulegt var. Öllum steinum var velt við. Sérstaklega var hugað að öllu því sem gerðist í aðdraganda hrunsins. Um þetta allt er fjallað í skýrslu RNA.
Þá tók slitastjórn bankans öll viðskipti í aðdraganda hrunsins til skoðunar. Allt sem gerðist í aðdraganda falls bankanna hefur því í tvígang verið rannsakað. Engar athugasemdir hafa nokkru sinni verið gerðar við viðskipti mín. Ég hef aldrei verið sakaður, af öðrum en ákveðnum blaðamönnum og einstaka pólitískum andstæðingi, um að hafa gert eitthvað misjafnt.“

Þá tekur Bjarni það að lokum fram að hann hafi tekið ákvörðun um það fyrir mörgum árum um að segja sig frá stjórnarstörfum fyrir fyrirtæki og losað sig við öll hlutabréf í þeim tilgangi að helga starfskrafta sína forystuhlutverki í íslenskum stjórnmálum.