Sandgerði og Garður sameinast

Sveitarfélögin Sandgerði og Garður verða sameinuð. Þetta er niðurstaða íbúakosningar sem fram fór í sveitarfélögunum í gær samkvæmt fréttatilkynningu.

Samþykkt var með 71,5% atkvæða í Garði að sameinast Sandgerði en 28,5% voru á móti. Á kjörskrá voru 1.134 manns og kusu 601 eða 53% þeirra sem voru á kjörskrá.

Sameiningin var samþykkt í Sandgerði með 55,2% atkvæða en 44,8% voru á móti. Á kjörskrá voru 1.200 manns og kusu 662 eða 55,2%. Þrír seðlar voru auðir og einn ógildur.

Kosin verður níu manna bæjarstjórn í maí 2018 og í framhaldinu tekur hið nýja sveitarfélag til starfa. Kosning fer fram á meðal íbúa um nafn á nýja sveitarfélagið.

Jöfnunarsjóður sveitarfélaga veitir nýja sveitarfélaginu 100 milljóna króna framlag til þess að endurskipuleggja stjórnsýslu og þjónustu auk 294 milljóna króna framlags til skuldajöfnunar.

Garður. www.mats.is

• Blogga um frétt