Brynjar Níelsson kveður Facebook

Brynjar Níelsson, þingmaður Sjálfstæðisflokksins, hefur ákveðið að hætta á Facebook „af heilsufarsástæðum“.

Á facebooksíðu sinni segir hann að samskipti á samfélagsmiðlinum séu vandmeðfarin og að kímnigáfa og skopskyn fólks sé mjög mismunandi.

„Sumir bera lítið skynbragð á kaldhæðni og þekkja bara orðið úr orðabókum. Viðbrögðin geta því verið ansi harkaleg og jafnvel ógeðfelld,” segir Brynjar og bætir við að sér hafi liðið vel áður en hann byrjaði á Facebook.

„Ég óttast að allir þessir samskiptamiðlar séu farnir að hafa alvarleg áhrif á geðheilsu þjóðarinnar. Sýnist að fólk sé að mestu hætt að tala saman og einu samskiptin séu þegar fólk er að sýna hvað öðru eitthvað í símanum. Kannski ekki skrítið að geðheilbrigðimál séu mesta áskorun stjórnmálanna í nánustu framtíð,“ segir Brynjar.

„Nú er svo komið að ég ætla, af heilsufarsástæðum, að kveðja Fésbókina, að minnsta kosti í bili. Eiginkonan mun gleðjast og kannski láta sjá sig aftur á meðal fólks og margir samflokksmenn mínir munu draga úr notkun róandi lyfja ef það er ekki orðið of seint. Kannski mun hin magnaða pólitíska hreyfing Pírata ná áttum. Kraftaverkin gerast.“

• Blogga um frétt