Borgarstjóri Reykjavíkur er ekki ábyrgur fyrir þeim skólpleka sem var vegna bilunar í skólpdælistöðinni við Faxaskjól, en vegna hans var miklu magni skólps veitt í sjóinn án hreinsunar. Þetta kemur fram í svari borgarlögmanns við fyrirspurn borgarráðsfulltrúa Framsóknar og flugvallarvina sem kynnt var í borgarráði nýlega.

Segir í svari borgarlögmanns að ábyrgð borgarstjóra á ábyrgð veitufyrirtækja í eigu borgarinnar og heilbrigðisnefnd geti einungis verið pólitísk sem oddviti meirihlutans í Reykjavík, en að hann beri ekki ábyrgð á ákvörðunum, athöfnum eða athafnaleysi sem rekja má til Orkuveitu Reykjavíkur, Veitna ohf. eða heilbrigðisnefndar Reykjavíkur.

Í fyrirspurninni er bent á að borgarstjóri sé æðsti embættismaður borgarinnar og ein af stjórnsýslustofnunum borgarinnar sé heilbrigðisnefnd Reykjavíkur. Þá komi fram í eigendastefnu OR að leitast sé við að skýra hlutverk og ábyrgð eigendanna og tryggja þátttöku þeirra í ákvörðun um mikilvæg málefni og stefnu. OR er móðurfélag Veitna, en það félag rekur skólphreinsistöðina.

Vegna bilunar í neyðarlúgu í fráveitukerfinu fór skólp út í sjó við Faxaskjól í Reykjavík. mbl.is/Golli

Í svarinu er vísað til þess að Orkuveitan sé sameignarfyrirtæki og sjálfstæður lögaðili. Borgarstjóri sitji ekki í stjórn Orkuveitunnar né gegni yfirmannsstöðu innan fyrirtækisins. „Ákvarðanir, athafnir eða athafnaleysi fyrirtækisins er því á ábyrgð sjálfstæðra stjórna og stjórnenda fyrirtækisins en ekki æðstu embættismanna sveitarstjórna eigenda Orkuveitu Reykjavíkur,“ segir í svarinu.

Aðeins sérstaklega stórar ákvarðanir eða stefnumarkandi eigi að fara beint á borð eiganda. „Samkvæmt 8. gr. eigendastefnu Orkuveitu Reykjavíkur þurfa aðeins óvenjulegar og stefnumarkandi ákvarðanir, nýjar skuldbindingar fyrirtækisins sem fara yfir 5% af bókfærðu eigin fé þess og áform um virkjanir eða aðra nýtingu auðlinda, að hljóta samþykki eigenda. Af eigendastefnu Orkuveitu Reykjavíkur verður því ekki leidd ábyrgð borgarstjóra á tjóni sem bilun í skólpdælistöðinni við Faxaskjól kann að hafa valdið eða hugsanlegri vanrækslu fyrirtækisins í tengslum við það.“

Svipaða sögu sé að segja um ábyrgð hans vegna dótturfélagsins Veitna, en þar séu ákvarðanir, athafnir eða athafnaleysi á ábyrgð sjálfstæðra stjórna og stjórnenda fyrirtækisins.

Vegna viðgerðanna þurfti að opna neyðarlúgur í dælustöðvum bæði við Skeljanes og Faxaskjól og óhreinsuðu skólpi hleypt í sjóinn. Mynd/Veitur

Í fyrirspurninni er einnig spurt um ábyrgð borgarstjóra á heilbrigðisnefndinni. Í svari borgarlögmanns segir að nefndin sé á ábyrgð borgarstjórnar en ekki borgarstjóra. Þá er tiltekið að heilbrigðisfulltrúar séu ráðnir af heilbrigðisnefndum og starfa í umboði nefndanna. „Heilbrigðisfulltrúar eru sjálfstæðir í starfi og bera einvörðungu ábyrgð gagnvart viðkomandi heilbrigðisnefnd. Borgarstjóri og aðrir stjórnendur Reykjavíkurborgar hafa því ekki boðvald yfir heilbrigðisfulltrúum þegar kemur að faglegu starfi þeirra.“

Tengdar fréttir

Skólpmengun við Faxaskjól

Óhreinsað skólp rann út í sjó

• Öflug vöktun vegna óhreinsaðs skólps
• Skólp fer í sjóinn í átta daga
• Klósettið er ekki ruslafata
• Skólpmengun hefur ekki áhrif á Kópavog

» Fleiri tengdar fréttir

• 2 blogg um fréttina

Bloggað um fréttina

• Þorsteinn Siglaugsson: Munur á kúk og skít
• Jóhann Elíasson: ÞETTA ER ALVEG NÝR "VINKILL" Á ÞVÍ HVER SÉ ÁBYRGÐ …