Heilbrigðiseftirlit Kjósarsvæðisins tekur vatnssýni á Seltjarnarnesi og í vatnsbóli í Mosfellsbæ í dag vegna jarðvegsgerla sem hafa mælst í kalda vatninu á Seltjarnarnesi, eins og í sumum hverfum í Reykjavík sem fá vatn úr ákveðnum borholum í Heiðmörk.

Frétt af mbl.is

Íbúar á Seltjarnarnesi sjóði neysluvatn

Um er að ræða lítið vatnsból í Mosfellsbæ fyrir lítinn hluta bæjarbúa, sem þegar er búið er að slökkva á.

Að sögn Árna Davíðssonar, heilbrigðisfulltrúa hjá Heilbrigðiseftirliti Kjósarsvæðis, koma niðurstöður símleiðis eftir tvo daga. Heildarniðurstöðurnar eru væntanlegar degi síðar.

„Það er alveg óhætt fyrir almenning að drekka þetta vatn,“ segir hann en nefnir að enn sé mælt með því að sérstaklega viðkvæmir neytendur skuli nota soðið vatn, þar á meðal gamalt fólk, fólk með ofnæmi og ungabörn.

„Þetta er svolítið blásið upp. Satt best að segja er ekki mikil hætta á ferðum. Þetta gerist í flestum vatnsbólum landsins einhvern tímann yfir árið,“ greinir hann frá og nefnir að sami gerlafjöldi komi oft upp í sumarbústöðum eftir leysingar eða rigningar á haustin.

„Menn geta alveg verið rólegir, ég drekk þetta vatn alveg hiklaust.“

Árni reiknar með því að Heilbrigðiseftirlit Kjósarsvæðis taki fleiri sýni á morgun, eða þangað til skýr skilaboð komi varðandi stöðu mála.

Tengdar fréttir

Jarðvegsgerlar í neysluvatni á höfuðborgarsvæðinu

Vatnið öruggt þrátt fyrir há gildi

• Góðar niðurstöður vatnssýna
• Þurfa að meta áhættu og viðbúnað
• Réttmæt gagnrýni Landspítalans
• Bæta við borholum í Heiðmörk

» Fleiri tengdar fréttir

• Blogga um frétt