Gjaldtaka verði skoðuð af alvöru

„Ég er mikill talsmaður þeirra aðferða að fjármagna vegakerfið með gjaldtöku af þeim sem nota viðkomandi vegi og tel það vera leið til þess að flýta framkvæmdum í samgöngum. Ég hef ekki skipt um skoðun síðan í september,“ segir Eyjólfur Árni Rafnsson, sem flytur erindi á opnum fundi á Akranesi í kvöld um samgöngumál á Vesturlandi.

Frétt af mbl.is

Í fyrsta sinn á ævinni hrædd við veginn

Hann var formaður starfshóps um möguleika á framkvæmdum á stofnleiðum í nágrenni Reykjavíkur og fjármögnun þeirra. Hann er einnig formaður Samtaka atvinnulífsins. 

Starfshópurinn skilaði af sér skýrslu þar sem lagt var til að ómönnuðum gjaldhliðum verði komið fyrir á helstu stofnvegum á Suðvesturlandi. Þar kom fram að gjaldtaka væri háð því hvaða leið yrði farin, frá því að vera 50% upp í 100% af gjaldskrá Hvalfjarðarganganna.

Frétt af mbl.is

Gjald verði lagt á helstu stofnvegi

Eyjólfur Árni Rafnsson. mbl.is/Hanna

„Ekki ýta henni í burtu“

„Ég tel það vera mjög áhugaverða leið til að bæta okkar stofnbrautir og auka öryggi þeirra. Ég tel þetta vera leið sem á að skoða af fullri alvöru. Ekki ýta henni í burtu án umræðu um kosti þess og galla,“ segir hann.

Varðandi tvöföldun Vesturlandsvegar að Hvalfjarðargöngum telur hann möguleika á verkefnið verði boðið út snemma á næsta ári.  

Eyjólfur Árni kveðst líta á fundinn í kvöld sem tækifæri til að skiptast á skoðunum um hvaða leiðir og lausnir eru færar.

Spurður segir hann aukinn þrýsting á að farið verði í vegaframkvæmdir á Kjalarnesi vera eðlilegan. „Þessar þrjár meginstofnleiðir frá höfuðborgarsvæðinu, að Reykjanesi, austur fyrir Selfoss og í Borgarnes eru gríðarlega mikilvægar leiðir til þess að laga og það þarf að gera það til að bæta öryggi,“ segir hann.

• Blogga um frétt