Ákærður fyrir að nauðga þroskahamlaðri konu

Héraðssaksóknari hefur ákært karl og konu fyrir að brjóta gegn þroskahamlaðri konu á þáverandi heimili þeirra 2. október 2016. Maðurinn er ákærður fyrir að nauðga konunni. Kæran var þingfest í Héraðsdómi Vestfjarða í dag. Í frétt RÚV kemur fram að parið neitaði sök við þingfestingu.

Konan fer fram á að maðurinn verði dæmdur til að greiða henni tvær milljónir króna í miskabætur og sambýliskona hans eina milljón króna.

Í ákærunni, sem fréttastofa RÚV hefur undir höndum, er maðurinn sagður hafa notfært sér að konan hafi verið ein og mátt sín lítils gagnvart honum og sambýliskonu hans inni „í lokuðu herbergi, undir áhrifum lyfja/og eða vímuefna, lömuð af hræðslu og fjarri öðrum á ókunnugum stað,“ líkt og fram kemur í ákærunni.

Þá er sambýliskona mannsins ákærð fyrir hlutdeild í nauðgun, meðal annars fyrir að hafa gefið konunni óþekkta töflu og látið hana reykja kannabisefni. Konan er einnig sögð hafa legið við hlið konunnar á meðan maðurinn braut gegn henni.

RÚV greinir einnig frá því að parið hefur ekki setið í gæsluvarðhaldi vegna málsins.

• Blogga um frétt