46 skipa sérsveit ríkislögreglustjóra

Sérsveit ríkislögreglustjóra skipa 46 einstaklingar, en það er um þriðjungur af fjölda starfsmanna embættisins. Samtals störfuðu þar 133 í ársbyrjun. Þetta er meðal þess sem kemur fram í svari dómsmálaráðherra við fyrirspurn Albertínu Friðbjargar Elíasdóttur, þingmanns Samfylkingarinnar, um starfsemi sérsveitarinnar.

Samkvæmt svarinu er sérsveitin stærsta einstaka deild ríkislögreglustjóra, en þar á eftir er fjarskiptamiðstöð með 19 starfsmenn. Í alþjóðadeild ríkislögreglustjóra starfa tíu manns og í greiningardeildinni eru níu starfsmenn. Hjá almannavarnadeild, stoðdeild og við rekstur upplýsingakerfa starfa svo á hverri deild átta starfsmenn. Sex starfa svo við mennta- og starfsþróun og einnig sex við tölfræði. Þá eru fjórir sem starfa við rekstur lögreglubifreiða.

Auk ríkislögreglustjóra eru svo sjö aðrir stjórnendur hjá embættinu og einn sem er tengiliður við Europol.

• Blogga um frétt