Ferðalangar fylgist með færð á vegum

Spáð er snjókomu og skafrenningi á heiðarvegum víða um landið vestan- og norðanvert í dag en styttir upp síðdegis norðanlands en fer þá að snjóa á Suðurlandi.

Í athugasemdum veðurfræðings hjá Veðurstofu Íslands kemur fram að þetta gæti leitt til erfiðra akstursskilyrða og eru ferðalangar hvattir til að fylgjast með færð á vegum og veðurspám.

Gul viðvörun er vegna veðurs á höfuðborgarsvæðinu og í Faxaflóa. 

Veðurstofan spáir suðlægri átt, þremur til tíu metrum á sekúndu og snjókomu víða um landið norðan- og vestanvert en úrkomulítið verður suðaustanlands.

Norðaustan 8 til 10 metrar á sekúndu verða norðvestantil en hægari vindur annars staðar fram á kvöld.

Snjókomubakki nær frá Breiðafirði austur yfir landið og færist suður með deginum. Styttir upp sunnantil seint í kvöld en norðaustan 3 til 8 metrar á sekúndu og éljagangur verða á Norðaustur- og Austurlandi.

Norðaustan 8-15 norðvestantil en hægari vindur annars staðar fram á kvöld. Á morgun verður norðan- og norðaustanátt, víða 10 til 15 metrar á sekúndu en norðvestan 15 til 20 metrar á sekúndu austast. Él verða á norðanverðu landinu en bjartviðri sunnan heiða.

Hiti verður yfir frostmarki með suður- og vesturströndinni að deginum, annars frost 0 til 8 stig en talsvert næturfrost í innsveitum norðanlands.

Veðurvefur mbl.is

• Blogga um frétt