Hrafnar voru farnir að tína sprek og glys í laup ofan á stalli á þríbýlishúsi í Vogahverfinu í Reykjavík, beint fyrir ofan svalir einnar íbúðarinnar, en Morgunblaðinu barst ábending þess efnis með mynd.
„Hrafnar hafa orpið á mannvirkjum nokkuð lengi, en oftast á mannlausum mannvirkjum. Það geta verið óþrif og læti af því að vera með laup nálægt heimili sínu. En þetta er bara viðhorf, sumum finnst gaman að hafa hann í návígi og fylgjast með fuglunum en öðrum finnst það óþægilegt,“ segir Kristinn Haukur Skarphéðinsson, dýravistfræðingur hjá Náttúrufræðistofnun Íslands, um hrafna í byggð í Morgunblaðinu í dag.
Hann segir æ algengara að hrafnar komi sér fyrir í byggð, á mannvirkjum og í trjákrónum, en öruggum náttúrulegum varpstöðum þeirra hafi fækkað og kjörlendi þeirra sé að færast í byggðina þar sem oft sé meira æti.