Innlent | mbl | 7.5.2018 | 22:22 | Uppfært 8.5.2018 14:33

Þjónustufulltrúar í Hörpu segja upp störfum

20 þjónustufulltrúar hafa sagt upp störfum í Hörpu í kjölfar umfjöllunar um launahækkun forstjóra. Ljósmynd/Harpa

Tuttugu þjónustufulltrúar í Hörpu, þar á meðal allir vaktstjórar, sögðu upp störfum í kvöld í kjölfar fundar með Svanhildi Konráðsdóttur, forstjóra Hörpu. Þetta kemur fram í yfirlýsingu frá þjónustufulltrúum í Hörpu.

Fundurinn var boðaður eftir fjölmiðlaumfjöllum um þjónustufulltrúa í Hörpu sem ofbauð launahækkun forstjóra, sem var sögð 20%, svo að hann sagði upp. Stuttu eftir að laun forstjóra voru hækkuð af stjórn Hörpu, voru laun þjónustufulltrúa lækkuð.

Stjórn tónlistar- og ráðstefnuhússins Hörpu sendi frá sér yfirlýsingu vegna umfjöllunar fjölmiðla þess efnis að laun forstjóra fyrirtækisins hafi hækkað um 20% eftir tvo mánuði í starfi.

Í yfirlýsingunni segir að vegna breytinga á kjarasamningi VR og nýrra laga um að laun forstjóra ríkisfyrirtækja skuli nú ákvörðuð af stjórnum þeirra en ekki kjararáði hafi launahækkunin numið 14,6% en ekki 20%.

Frétt af mbl.is

Segja launin ekki hafa hækkað um 20%

Í yfirlýsingu þjónustufulltrúanna segir að margir þeirra hafi verið mjög ósáttir við skýringar forstjórans, sérstaklega í ljósi þess að engir aðrir starfsmenn hússins þurftu að taka á sig launalækkun. Þjónustufulltrúar eru sá hópur starfsmanna sem er launalægstur allra starfsmanna í Hörpu. „Ákváðu því allir þjónustufulltrúar sem sátu fundinn að segja þegar upp störfum, 15 talsins og nokkrir aðrir í kjölfarið,“ segir í yfirlýsingu.

Yfirlýsing þjónustufulltrúa Hörpu:

Tuttugu þjónustufulltrúar í Hörpu hafa ákveðið að segja upp störfum sínum í kjölfar fundar með Svanhildi Konráðsdóttur, forstjóra Hörpu, í dag. Fundurinn var boðaður eftir fréttir um þjónustufulltrúa í Hörpu sem ofbauð svo launahækkun Svanhildar að hann sagði upp. Stuttu eftir að laun forstjóra voru hækkuð af stjórn Hörpu, voru laun þjónustufulltrúa lækkuð. Á fundinum staðfesti Svanhildur að þjónustufulltrúar Hörpu væru einu starfsmennirnir sem gert var að taka á sig beina launalækkun. Hópur starfsmanna sem þá þegar var launalægstur allra starfsmanna Hörpu.

Eftir fundinn voru margir þjónustufulltrúar mjög ósáttir við skýringar forstjórans, þá sérstaklega um það af hverju engir aðrir starfsmenn hússins hafi þurft að taka á sig launalækkun. Ákváðu því allir þjónustufulltrúar sem sátu fundinn að segja þegar upp störfum, 15 talsins og nokkrir aðrir í kjölfarið. Meðal þeirra sem sögðu upp voru t.d. nokkrir búnir að vinna í Hörpu frá opnun og flestir með langan starfsaldur, meðal annars allir vaktstjórar.

Svanhildur talaði um að á sínum tíma eða í september 2017, hefðu launalækkanir þjónustufulltrúa verið mildar aðgerðir sem væru hluti af samstilltu átaki um að rétta af fjárhag Hörpu. Af þessu má sjá að ákveðið misræmi er greinilega í þeirri staðhæfingu þar sem aðeins lægst launuðu starfsmenn hússins hafa tekið á sig beina launalækkun.

Fyrir u.þ.b tveimur árum var starfi okkar breytt úr sætavísum í starf þjónustufulltrúa. Þessari breytingu fylgdu aukin verkefni sem fólust til dæmis í því að ganga frá tækjum og búnaði eftir viðburði. Við það skapaðist hagræðing þar sem ekki þurfti lengur að kalla út aðra starfsmenn til þessara verka en þjónustufulltrúar fengu hækkun á sínum launum í samræmi við þessi auknu verkefni. Þann 1. janúar tóku þjónustufulltrúar á sig umtalsverða launalækkun í góðri trú um að það myndu aðrir starfsmenn Hörpu líka gera.

Á fundinum upplifðu þjónustufulltrúar ákveðna vanþekkingu á starfi sínu á meðal stjórnenda Hörpu sem sátu fundinn. Það að segja upp starfinu hjá Hörpu er mjög stór ákvörðun enda þykir okkur öllum mjög vænt um starfið okkar, húsið og gesti þess.