Hafís sem borist hefur frá austurströnd Grænlands er næst landi í aðeins sjö sjómílna fjarlægð norður af Hornströndum.
Núverandi vindátt veldur því að ísinn færist sífellt nær og er því ekki ólíklegt að jaka beri að landi. Landhelgisgæslan og lögreglan á Vestfjörðum fylgjast náið með málum og eru í viðbragðsstöðu, m.a. vegna ísbjarna.
„Ísbirnir una sér best á ís og því kemur mikil bráðnun íss sér illa fyrir þá. Erfitt er að áætla hvort og hvenær ísbirni rekur hingað en það er alltaf möguleiki,“ segir Ingibjörg Jónsdóttir landfræðingur, í umfjöllun um hafískomuna í Morgunblaðinu í dag.