Sverrir Mar býður sig fram til formennsku ASÍ

Sverrir Mar Albertsson, framkvæmdastjóri AFLs starfsgreinasambands, hefur ákveðið að bjóða sig fram til formennsku í Alþýðusambandinu á þingi sambandsins í október. Þetta staðfestir hann í samtali við mbl.is.

Sverrir segir að síðustu misseri hafi augljóslega orðið vík milli vina innan sambandsins og framámenn í verkalýðshreyfingunni skipst í tvær fylkingar. Nauðsynlegt sé að reyna að koma á friði. „Ég treysti mér mjög vel til að vinna með öllum hópum innan Alþýðusambandsins,“ segir Sverrir og bætir við að Gylfi Arnbjörnsson hafi gert vel að stíga til hliðar í dag og sýnt að enginn maður sé stærri en Alþýðusambandið.

Frétt af mbl.is

Gylfi ekki áfram forseti ASÍ

Sverrir segir að þrátt fyrir gagnrýni hafi Gylfi haft nokkuð stöðugt fylgi innan sambandsins. „En það er ekkert í málflutningi þeirra sem hafa verið að gera sig gildandi í ASÍ síðustu mánuði sem ég kippi mér upp við.“

Spurður út í tímasetningu yfirlýsingarinnar segir hann að hann hefði ekki tilkynnt um framboð í dag ef ekki væri fyrir yfirlýsingu Gylfa. Hann útilokar þó ekki að hann hefði boðið sig fram.

Sverrir segist vilja stefna að því að aðildarfélög ASÍ axli meiri ábyrgð í kjarasamningsviðræðum, enda séu þær í höndum þeirra en ekki Alþýðusambandsins. Vill hann minnka vægi ASÍ þannig að sambandið sé meira hinn faglegi samráðsvettvangur sem annast mál sem tengjast öllum launamönnum.

• Blogga um frétt