Áætlað er að félög tengd Norvik í timburvinnslu muni velta um 23 milljörðum króna í ár. Það yrði um 10% aukning milli ára. Umsvif Norvik í timbri hafa aldrei verið meiri síðan félagið hóf timburvinnslu í Lettlandi árið 1993.
Jón Helgi Guðmundsson, forstjóri og stjórnarformaður Norvik, segir Indlandsmarkað vera að opnast fyrir Norvik. „Ég tel að Indland sé á uppleið eins og Kína fyrir 10 til 15 árum. Við höfum fengið margar fyrirspurnir þaðan,“ segir Jón Helgi í umfjöllun um fyrirtæki hans í Morgunblaðinu í dag.
Verð á timbri hefur farið hækkandi. Jón Helgi segir sölu Norvik takmarkast af framboði. Með meira hráefni gæti félagið selt meira.