Bergþóra nýr forstjóri Vegagerðarinnar

Bergþóra Þorkelsdóttir hefur verið skipuð forstjóri Vegagerðarinnar og mun hún taka til starfa 1. ágúst. Alls sóttu 25 um stöðu forstjóra en tveir drógu umsóknir sínar til baka.  

Í tilkynningu frá Stjórnarráði Íslands segir að Bergþóra hafi víðtæka rekstrar- og stjórnunarreynslu og þekkingu á íslensku atvinnulífi, en hún hefur verið stjórnandi í um 20 ár. Síðast var hún forstjóri ÍSAM ehf., en auk þess hefur hún starfað sem framkvæmdastjóri Líflands og Kornax og hjá Fastus. Hún situr í stjórn Viðskiptaráðs og hefur áður setið í stjórn Samtaka iðnaðarins og í fulltrúaráði Samtaka atvinnulífsins.

Í greinargerð hæfnisnefndar eru fjórir umsækjendur tilgreindir sem taldir voru hæfastir til að gegna starfinu. Bergþóra var ein þeirra og í hlutlægu hæfnismati fékk Bergþóra flest stig.

Lilja Alfreðsdóttir, settur samgöngu- og sveitarstjórnarráðherra í málinu, skipaði Bergþóru í embættið eftir að Sigurður Ingi Jóhansson, samgöngu- og sveitarstjórnarráðherra, sagði sig frá málinu vegna vanhæfis.

Frétt af mbl.is

25 sóttu um embætti forstjóra

• Blogga um frétt