Benedikt Bogason hæstaréttardómari hefur áfrýjað dómi héraðsdóms í máli hans gegn Jóni Steinari Gunnlaugssyni, lögmanni og fyrrverandi hæstaréttardómara. Dómur féll í málinu fyrir tæplega tveimur vikum og áfrýjaði Benedikt málinu viku síðar. Þetta kemur fram í áfrýjunarskrá á vef Landsréttar.
Í málinu fór Benedikt fram á að ummæli í bók Jón Steinars í ritinu „Með lognið í fangið - Um afglöp Hæstaréttar eftir hrun“, yrðu dæmd dauð og ómerk. Þá fór hann einnig fram á að fá greiddar tvær milljónir í miskabætur. Byggði hann málsókn sína á að ummælin „dómsmorð“ væru ærumeiðandi aðdróttanir eins og þau birtust í bókinni og Jón Steinar hafi með þeim fullyrt að Benedikt hafi af ásetningi komist að rangri niðurstöðu í dómsmáli með þeim afleiðingum að saklaus maður hafi verið sakfelldur og dæmdur í fangelsi.
Á þetta féllst dómari ekki og segir að þrátt fyrir að Jón Steinar taki sterkt til orða í bókinni þá saki hann Benedikt hvergi um refsivert athæfi. Né heldur sé þeim beint að Benedikt persónulega heldur Hæstarétti í heild.