Greint frá komu Kjærsgaard í apríl
Setja bókamerki
„Pia Kjærsgaard mun flytja sérstakt ávarp á Þingvallafundi og kveðju dönsku þjóðarinnar á fullveldisári Íslands.“ Þetta kemur fram í tilkynningu á vef Alþingis frá 20. apríl en daginn áður funduðu Steingrímur J. Sigfússon, forseti Alþingis, og Kjærsgaard.
Töluvert hefur verið rætt og ritað um þá ákvörðun að bjóða Kjærgaard að flytja ávarp á hátíðarfundinum sem fram fór í gær. Hún er stofnandi Danska þjóðarflokksins en hörð stefna hennar í málefnum innflytjenda hefur vakið andúð margra.
Þingflokkur Pírata ákvað að sniðganga fundinn vegna þess að Kjærsgaard var boðið að flytja ávarp. Þá gekk Helga Vala Helgadóttir burt af þingpöllum þegar Kjærsgaard tók til máls.
Steingrímur sagði í samtali við mbl.is í gær að boð Kjærsgaard hefði ekkert með skoðanir hennar að gera, heldur vegna þess að hún er forseti danska þingsins. Hann sagði málið hafa verið undirbúið í góðu og miklu samráði allra flokka. „Ég hafði ekki hugmynd um að það væri ágreiningur um eitt eða neitt í þeim efnum fyrr en í hádeginu í dag [gær],“ sagði Steingrímur.
Jón Þór Ólafsson, þingmaður Pírata og fulltrúi í forsætisnefnd, gagnrýndi í gær að ekki hefði verið upplýst aðkomu Kjærsgaard fyrr en í gær þrátt fyrir að henni hafi verið boðið til landsins í apríl. Hann ætlar að kalla eftir skýrum svörum frá forsætisnefnd vegna málsins.
Jón Þór var á fundi forsætisnefndar Alþingis í fyrradag þar sem tilkynnt var um komu Kjærsgaard en gerði ekki athugasemd frekar en aðrir. Hann segist ekki hafa áttað sig á því hver hún væri. Þá gagnrýnir hann að forsætisnefnd hafi ekki verið upplýst um málið fyrr en degi fyrir hátíðarfundinn og að þá hafi Kjærsgaard verið komin til landsins.
„Tímabil aukinnar eldvirkni“
Lát hjóna í Neskaupstað: Ákæra gefin út
„Þetta er ríkisstjórn almannahagsmuna“
Var engin kristnitaka árið 1000?
„Börn heima sem maður myndi vilja hafa í skjóli“
Ný ríkisstjórn kynnt á morgun
Barn lést í árásinni
„Mér finnst gamla Samfylkingin komin aftur“
