Hey til Noregs fyrir um 200 milljónir

Heyútflutningur til Noregs hefst um miðjan mánuð. Samið hefur verið við norskar stofnanir um útflutning á 30 þúsund rúllum frá Norðurlandi og eru fleiri samningar væntanlegir. Ríkisútvarpið greinir frá þessu. Bændur fá 6.000-9.000 krónur á rúlluna, eftir innihaldi, samkvæmt upplýsingum Morgunblaðsins. Því má gera ráð fyrir að virði heyútflutningsins sé á bilinu 180-270 milljónir króna.

Frétt af mbl.is

Bændur bíða Norðmanna

Norska matvælastofnunin hefur um skeið verið með í skoðun hvaða svæði á landinu uppfylli skilyrði til innflutnings og hefur stofnunin nú birt lista yfir tólf svæði á landinu sem það gera. Meðal þeirra eru Snæfellsnes, Dalir, Vestfirðir, Eyjafjörður, Biskupstungur, Grímsnes og Austfirðir. Haft er eftir stofnuninni að hverfandi eða lítil sjúkdómahætta sé af heyi frá þessum svæðum á Íslandi en von er á að rúllurnar 30 þúsund komi úr Eyjafirði, Skagafirði og Þingeyjarsýslum.

Kaupendur eru þrír. Felleskjøpet Agri, sem er kaupfélag, sláturhúsið Nortura og Tine, sem er mjólkurframleiðandi. Á heimasíðunni Fôrformidling (Fóðurmiðlunin) hafa norskir bændur alls óskað eftir 168.000 heyrúllum en Norðmenn hafa einnig skoðað heykaup frá Kanada og Bandaríkjunum þótt Matvælastofnunin norska telji smithættu þar meiri en hérlendis.

• Blogga um frétt