Innlent | mbl | 24.8.2018 | 15:00 | Uppfært 15:25

Þrír menn úrskurðaðir í átta vikna farbann

Lögreglustjórinn á Suðurnesjum krefst áframhaldandi farbanns yfir þremur mönnum. Mynd/mbl.is

Sindri Þór Stefánsson og tveir aðrir menn voru fyrr í dag úrskurðaðir í áframhaldandi farbann af Héraðsdómi Reykjaness. Farbannið gildir til 26. október. Þetta staðfestir Ólafur Helgi Kjartansson, lögreglustjóri á Suðurnesjum, í samtali við mbl.is.

Einn mannanna hefur þegar kært úrskurðinn til Landsréttar en hinir tveir ætla að taka sér umhugsunarfrest, segir Ólafur Helgi einnig.

Fréttin var uppfærð klukkan 15:00.

Farið verður fram á áframhaldandi farbann yfir Sindra Þór Stefánssyni og tveimur meintum samverkamönnum hans. Þetta staðfestir Ólafur Helgi Kjartansson, lögreglustjóri á Suðurnesjum, í samtali við mbl.is. Héraðsdómur Reykjaness úrskurðaði mennina í farbann í lok júlí og rennur það út í dag.

Frétt af mbl.is

Þrír áfram í farbanni

Mennirnir eru grunaðir um stórfelldan þjófnað á 600 tölvum úr þremur gagnaverum að andvirði 200 milljóna íslenskra króna. Ákæra í málinu hefur verið lögð inn til héraðsdóms en hún hefur ekki verið birt enn sem komið er. Talið er að málið sé stærsta þjófnaðarmál Íslandssögunnar.