Líf og fjör á Akureyrarvöku

Akureyrarvaka fer fram um helgina og var sett í gær í rómantísku rökkri Lystigarðsins. Kristján Edelstein tók á móti gestum með ljúfum gítartónum og Hilda Jana Gísladóttir, formaður stjórnar Akureyrarstofu, setti hátíðina.

Akureyrarvaka er árleg bæjarhátíð sem er haldin síðustu helgina í ágúst sem næst afmæli Akureyrarbæjar 29. ágúst. Dagskráin er afar fjölbreytt og brá fréttaritari Morgunblaðsins sér til að mynda á setningarhátíðina í gær og á Vísindasetur í Hofi og Listagilið í dag, þar sem fornbíladeild BA gerði tilraun til að koma fyrir eins mörgum fornbílum og mögulegt er í gilinu. Þá var einnig fjölmennt þegar Listasafnið á Akureyri var opnað á ný. 

Dagskráin nær hápunkti í kvöld klukkan 21 með stórtónleikum í Listagilinu þar sem Svala, Jónas Sig, Salka Sól, Magni og Birkir Blær koma fram.