Miðað við nýja samgönguáætlun sem gildir frá árinu 2019 til 2023 og langtímaáætlun til ársins 2033 er ekki gert ráð fyrir því að tvöföldun Reykjanesbrautarinnar ljúki fyrr en eftir fimmtán ár.
Gert er ráð fyrir því að verki við Reykjanesbraut frá Kaldárselsvegi að Krýsuvíkurvegi ljúki á árunum 2019 til 2020, en fjórir kaflar Reykjanesbrautar, frá Holtavegi að Stekkjarbakka, Álftanesvegi að Lækjargötu, Krísuvíkurvegi að Hvassahrauni, Fitjum að flugstöð eru ekki á dagskrá fyrr en eftir árið 2023.
Óánægja er strax farin að koma fram með þessa áætlun og þykir mönnum biðin eftir að tvöföldun Reykjanesbrautarinnar ljúki, ansi löng.
Sigurður Ingi Jóhannsson samgönguráðherra, sem kynnti helstu atriði samgönguáætlunar á BSÍ fyrr í dag, segir slíka óánægju skiljanlega. Hann vonast hins vegar til að með því að fá inn nýtt fjármagn í gegnum gjaldtöku verði hægt að flýta vinnu við Reykjanesbrautina.
„Það er skiljanlegt að mönnum finnist þetta langur tími, en strax á næstu árum eru menn að taka þann kafla í Hafnarfirði og tengingar eða vegi sem eru hluti af Reykjanesbrautinni inn í Reykjavík, til þess að bæta umferðarflæðið og öryggið. En menn eru líka að tala um að aðskilja akstursstefnu frá Krísuvíkurafleggjaranum að Kúagerði í gegnum Hvassahraunið, þó svo að breikkunin verði síðar, einmitt til að tryggja umferðaröryggi,“ segir Sigurður Ingi í samtali við mbl.is.
„Það voru byggð tvö hringtorg við Reykjanesbæ í fyrra í sama tilgangi en vonandi getum við sett inn ný verkefni með annarri fjármögnun og þá væntanlega einhvers konar gjaldtöku sem gerir það að verkum að við getum flýtt þessu verkefni. Það er planið. En einhver veginn verðum við að segja fram samgönguáætlun,“ útskýrir Sigurður Ingi.
„Seinni tvö tímabilin eru auðvitað ekki með fjarmagn og inni á fjármálaætlun og margt getur auðvitað breyst við næstu áætlun,“ bætir hann við.