Fullur stuðningur við samninganefndina

Fullum stuðningi var lýst yfir við forystu Læknafélags Reykjavíkur og samninganefnd þess í viðræðum við ríkið á fjölmennum fundi sérfræðilækna í kvöld.

Þetta sagði formaður félagsins, Þórarinn Guðnason, í fréttum Ríkisútvarpsins. Sagði hann lækna ákveðna í að standa saman. Ársframlenging á rammasamningi, sem Svandís Svavarsdóttir heilbrigðisráðherra hefur boðað, þætti frekar stuttur tími.

Frétt af mbl.is

Vill framlengja rammasamning um ár

Þórarinn sagði enn fremur að stjórn Læknafélagsins og samninganefnd hefðu fengið umboð til að ræða við heilbrigðisráðherra og fundað yrði á fimmtudaginn í næstu viku. Fundinn í kvöld sátu um 110 sérfræðilæknar og lauk honum um klukkan tíu í kvöld.

Sagði Þórarinn aðspurður sérfræðilækna bjartsýna á framhaldið. „Ég sé ekki annað en að við förum í þessar viðræður með opnum huga og góðum huga og sé ekki annað en að viðræðurnar sem byrja í næstu viku eigi að geta orðið góðar.“

• Blogga um frétt