Píratar sagðir erfiðir í samstarfi

Að undanförnu mun hafa verið grunnt á því góða á milli þingmanna Pírata og ýmissa annarra þingmanna á Alþingi. Þetta hefur Morgunblaðið eftir nokkrum þingmönnum, bæði stjórnarliðum og stjórnarandstæðingum, sem hafa fullyrt í eyru blaðamanns að Píratar væru afskaplega erfiðir í samstarfi.

Píratar sem Morgunblaðið hefur rætt við vísa því á bug, að þeir séu erfiðir í samstarfi, að því er fram kemur í fréttaskýringu um þetta efni  í blaðinu í dag.

Einn þingflokksformaður sem rætt var við orðaði þetta svo: „Píratar eru mjög flóknir í samskiptum. Varðandi gang mála hér á þinginu þurfa menn að eiga alls konar samstarf og samráð, bæði formlegt og óformlegt. Í haust hafa Píratar verið alveg sérstaklega erfiðir í samskiptum og viljað hafa allt í mjög föstu formi, sem getur virkilega þvælt ákvarðanatöku og afgreiðslu mála.“