Styðja útgáfu bóka á íslensku

Frumvarp til laga um stuðning við útgáfu bóka á íslensku verður lagt fram á Alþingi í októberbyrjun. Í tilkynningu frá mennta- og menningarmálaráðuneytinu kemur fram að markmið laganna sé að efla bókaútgáfu á íslenskri tungu í ljósi mikilvægis hennar fyrir þróun íslenskunnar og bætt læsi þjóðarinnar.

Frumvarpið er liður í aðgerðum til stuðnings íslensku máli og heimilar endurgreiðslu 25% kostnaðar vegna útgáfu bóka á íslensku. Áætlað framlag vegna þessa er um 400 milljónir króna frá og með árinu 2019 en sú fjárhæð er um 17% af núverandi veltu íslenskrar bókaútgáfu miðað við tölur síðasta árs.

„Það er staðreynd að lestur og bóksala hefur dregist verulega saman á undanförnum árum og það er ekki síst á herðum íslenskrar bókaútgáfu að bregðast við þeim aðstæðum og þróa sína útgáfu svo hún mæti betur lesendahóp dagsins í dag. Þessi endurgreiðsluleið skapar tækifæri til þess og von okkar er að hún muni hafa jákvæða keðjuverkun í för með sér fyrir íslenska lesendur og alla þá er koma að bókaútgáfu hér á landi,“ er haft eftir Lilju Alfreðsdóttur, mennta- og menningarmálaráðherra, í tilkynningu.

Frétt af mbl.is

Velta bókaútgáfu úr 4 milljörðum í 2,5

Ráðgert er að endurgreiðslurnar muni hvetja til aukinnar útgáfu á prenti og rafrænum miðlum og auka framboð og fjölbreytni efnis fyrir lesendur. Fordæmi fyrir þessari stuðningsleið má meðal annars finna í tímabundnum endurgreiðslum vegna kvikmyndagerðar og hljóðritunar sem gefist hafa vel.

Helstu skilyrði fyrir endurgreiðslum samkvæmt frumvarpinu eru meðal annars að útgefin bók sé á íslensku, umsækjandi sé skráður virðisaukaskattsskyldur aðili og að endurgreiðsluhæfur kostnaður umsækjanda nemi a.m.k.einni milljón króna.

Fyrirhugað er að gerð verði úttekt á árangri þessarar aðgerðar fyrir lok árs 2022 og lögin komi til endurskoðunar fyrir 31. desember 2023.

• Blogga um frétt