Boðun vinnustöðvunar úrslitakostur
Setja bókamerki
„Krafan er skýr; við teljum að þessir starfsmenn séu á íslenskum vinnumarkaði,“ segir Berglind Hafsteinsdóttir, formaður Flugfreyjufélags Íslands. Félagar í Flugfreyjufélagi Íslands hafa samþykkt að boða til ótímabundinnar vinnustöðvunar flugfreyja um borð í flugvélum Primera sem fljúga með farþega frá og til Íslands.
Flugfélagið hefur ekki viljað gera kjarasamning við Flugfreyjufélagið og greiðir því ekki samkvæmt íslenskum kjarasamningum. Flugliðar Primera starfa sem verktakar en í greinargerð sem lögfræðingur ASÍ lagði fyrir félagsdóm fyrr á árinu kom m.a. fram að Primera Air hefði starfsstöð hér á landi, og hér giltu íslensk lög og réttarreglur.
Vinnustöðvunin hefst klukkan sex að morgni 15. nóvember hafi samningar ekki tekist fyrir þann tíma.
Flugfreyjufélagið samþykkti vinnustöðvun gegn Primera Air í fyrra. Félagsdómur komst þá að þeirri niðurstöðu að vegna formgalla væru aðgerðir ólögmætar vegna þess að ríkissáttasemjari hafði ekki hlutast til um málið áður en gripið var til aðgerða.
„Þau fljúga frá og til Íslands; heimahöfnin er á Íslandi. Við teljum að þau eigi að njóta lágmarksréttinda í sinni starfsgrein,“ segir Berglind.
Í áðurnefndri greinargerð kom enn fremur fram að meðallaun nýliða hjá íslensku flugfélögunum væru á bilinu 405 til 413 þúsund krónur á mánuði en aðeins 216 þúsund krónur í heildarlaun hjá Primera Air, sem verktakalaun.
Berglind segir að krafan sé einföld, að gerður sé kjarasamningur við flugliða Primera Air. „Hvorki þeir né stjórnvöld hafa gripið inn í og að boða vinnustöðvun er úrslitakostur,“ segir Berglind og bætir við að boltinn sé nú hjá forsvarsmönnum Primera Air.
„Aðstæður í stjórnmálum geta breyst á einni nóttu“
Fyrsti blaðamannafundurinn í heild sinni
„Tímabil aukinnar eldvirkni“
Skattamál verði líklega „þeirra mesta klemma“
Hrikalegt að heyra fréttirnar
Bjarni afhenti Kristrúnu lyklana
„Þetta er ríkisstjórn almannahagsmuna“
