Vélin fór aftur í loftið eftir skoðun

Farið var yfir loftræstikerfi og skipt um síur í vél Icelandair eftir að fjórir flugliðar leituðu lækn­isaðstoðar eft­ir að þeir komu til lands­ins frá Ed­mont­on í gærmorg­un. Vélin fór aftur í loftið síðdegis í gær.

„Við erum með ákveðna skoðun sem fer í gang ef svona kemur upp,“ segir Jens Þórðar­son, fram­kvæmda­stjóri rekstr­ar­sviðs Icelanda­ir, við mbl.is. Stíflaðar eða skítugar síur urðu þess valdandi að loftflæðið var skert.

Hann sagði í gær Icelandair hafi í gegnum tíðina öðru hverju fengið mál tengd van­líðan í flug­vél­um hjá áhafn­ar­meðlim­um. Slík tilvik komi upp hjá flest­um flug­fé­lög­um þar sem loft­gæði eru skert um borð í flug­vél­um al­mennt.

Frétt af mbl.is

Leituðu læknisaðstoðar eftir flug

Starfsfólk í áhöfn fann fyrir óþægindum, höfuðverk og þreytueinkennum eftir flugið en ekkert bendir til þess að farþegar hafi fundið fyrir slíkum óþægindum. „Það er mjög sjaldgæft að farþegar kenni sér meins þegar svona gerist,“ segir Jens og bætir við að aðstæður þeirra séu öðruvísi vegna þess að farþegar eru að mestu leyti kyrrir í vélinni.

Hann segir að Icelandair vilji tryggja góða vinnuaðstöðu um borð í sínum vélum og fari oft yfir loftræstikerfi sinna véla. „Við skoðum þetta oft, oftar en okkur er uppálagt af framleiðundum og yfirvöldum.“

Aðspurður segir Jens að ekki hafi verið haft samband við áhöfnina síðan í gær en þau séu að hvíla sig. „Það verður farið í gegnum þetta með þeim eftir helgi.“

• Blogga um frétt