Ólafur vill að dómari víki vegna tengsla

Ólafur Ólafsson, athafnamaður og fyrrverandi hluthafi í Kaupþingi, krefst þess að Vilhjálmur Vilhjálmsson dómari víki sæti í máli gegn honum fyrir Landsrétti. Þetta kemur fram á vef RÚV, en málflutningur hófst í morgun.

Í málinu sem um ræðir er tekist á um kröfu Ólafs um endurupptöku á þætti hans í Al Thani-málinu. Héraðsdómur Reykjavíkur hafnaði í lok síðasta árs kröfu hans um að fella úr gildi úrskurð endurupptökunefndar sem komist hafði að þeirri niðurstöðu að ekki væri efni til að endurupptaka Al Thani-málið þar sem Ólafur var sakfelldur fyrir markaðsmisnotkun.

Frétt af mbl.is

Héraðsdómur hafnar kröfu Ólafs

Rökstuðningur Ólafs fyrir kröfunni er þríþættur. Í fyrsta lagi tilgreinir hann að Vilhjálmur sé vinur Markúsar Sigurbjörnssonar, fyrrverandi forseta Hæstaréttar, sem dæmdi í Al Thani-málinu á sínum tíma. Í öðru lagi að Finnur, sonur Vilhjálms, hafi gert Hauck & Aufhauser-skýrsluna um einkavæðingu Búnaðarbankans þar sem fjallað er um kaup Ólafs á bankanum. Í þriðja lagi vegna þess að Ingi Freyr, sonur Vilhjálms, hafi skrifað svo margar fréttir um hann í gegnum tíðina.

Ólaf­ur höfðaði mál gegn embætti rík­is­sak­sókn­ara og ís­lenska rík­inu í júní 2016. Hann krafðist þess að felld­ur yrði úr gildi úr­sk­urður end­urupp­töku­nefnd­ar frá 26. janú­ar 2016 þar sem hafnað var beiðni hans um end­urupp­töku Al Thani-máls­ins, sem dæmt var í Hæsta­rétti Íslands 12. fe­brú­ar 2015. Var Ólafur þá fundinn sekur um markaðsmisnotkun og dæmdur til fjögurra og hálfs árs fangelsisvistar.

• Blogga um frétt