Örlög Þorfinns óráðin

Óvíst er hvort bronsstytta myndhöggvarans Einars Jónssonar af íslenska landkönnuðinum Þorfinni karlsefni verður reist að nýju eftir að henni var velt af stalli sínum í Fairmount-garðinum í Fíladelfíuborg í Bandaríkjunum.

Frétt af mbl.is

Þorfinni karlsefni velt af stalli

Samkvæmt fjölmiðlum þar ytra fannst styttan, sem er rúmlega tveggja metra löng og hátt í tonn að þyngd, liggjandi ofan í Schuylkill-ánni sem rennur framhjá Fairmount-garðinum snemma aðfaranótt þriðjudags. Á vettvangi fundust brot úr styttunni og kúbein sem er talið hafa verið notið til að velta henni af stalli sínum.

Yfirvöld hófu í kjölfarið rannsókn á málinu og voru kafarar sendir út í ána til að skoða aðstæður.

Á þriðjudagskvöld var kranabíll notaður til að draga styttuna úr ánni og kom þá í ljós að höfuðið hafði brotnað af styttunni.

Fíladelfíuborg hefur þegar ráðið fyrirtæki til að lagfæra styttuna en of snemmt er að segja til um hvort hún verði endurreist á sama stað.

Styttan af Þorfinni var smíðuð árið 1918 og var reist 20. nóvember árið 1920. Hún hafði því staðið í Fairmount-garðinum í nærri heila öld.

Bandarískir fjölmiðlar hafa greint frá því að styttan hafi áður orðið fyrir skemmdarverkum þegar rauðri málningu var sprautað á andlit hennar á síðasta ári. Þá voru slagorð gegn nasisma einnig rituð á hana auk merkis anarkista.

Talið var að sá gjörningur hefði verið framinn til þess að mótmæla hvítum þjóðernissinnum sem hafa í gegnum tíðina haldið samkomur við styttuna á degi Leifs Eiríkssonar. Yfirvöld hafa enn sem komið er ekki tjáð sig um mögulegar ástæður þess að styttunni var velt ofan í ána.

Þorfinnur karlsefni var íslenskur landkönnuður sem er sagður hafa numið land í Vínlandi og heimildir um hann má finna í Grænlendingasögu og Eiríks sögu rauða. Annað eintak af Þorfinni karlsefni má sjá við Hrafnistu, dvalarheimili aldraðra í Reykjavík.