Var vísað frá Íslandi og dvelja í skógi
Jóhann Ólafsson
Setja bókamerki
Nasr Mohammed Rahim og Sobo Answar Hasan og börn þeirra, Leó og Leona, hafa flúið frá Þýskalandi eftir að til stóð að umsókn þeirra um alþjóðlega vernd þar yrði hafnað. Áður höfðu þau verið flutt frá Íslandi til Þýskalands í fyrra. Þau óttast um líf sitt verði þau send heim til Írans og Írak.
Þriggja manna fjölskyldan Nasr, Sobo og eins og hálfs árs gamall Leó var flutt frá Íslandi í lok nóvember í fyrra. Hingað komu þau í mars í fyrra eftir að beiðni þeirra um hæli í Þýskalandi hafði verið hafnað.
Frá Íslandi voru þau flutt til Þýskalands, þar sem þau hafa dvalið í flóttamannabúðum í tíu mánuði. Þriggja manna fjölskyldan varð fjögurra manna og er Leona sex mánaða gömul.
Nasr og Sobo líta á sig sem Kúrda en Nasr er með írakst ríkisfang og Sobo með íranskt. Faðir Sobo er háttsettur íslamskur klerkur og var fjölskylda hennar algjörlega á móti því að hún giftist Nasr. Kúrdar eru þjóðarbrot sem býr í fjallahéruðum Tyrklands, Íraks og Írans og í minna mæli í Sýrlandi og Armeníu. Þeir eru um 30-35 milljónir og eru þar með stærsta ríkislausa þjóðarbrot heims.
Samkvæmt upplýsingum frá vini Nasr er ástand fjölskyldunnar alls ekki gott. Þau hafast við í skóglendi í Frakklandi og þau vita að ef þau verða send aftur til baka verður fjölskyldunni í besta fallið sundrað. Nasr hefur sjálfur sagt áður að þeirra bíði dauðarefsing snúi þau aftur heim.
Vinurinn heyrði síðast í Nasr fyrir tveimur dögum síðan og kveðst aðspurður ekki hafa hugmynd um áætlanir fjölskyldunnar, eða hvort flóttinn frá Þýskalandi hafi verið úthugsaður. Hann segir að fjölskyldan geri hvað sem er til að forðast blottflutning aftur til Írans og Írak og því hafi flóttinn líklega ekki verið skipulagður.
„Ég grátbað yfirvöld um að fá að dvelja hérna. Okkur hafa borist hótanir í gegnum Facebook eftir að við vorum skírð til kristni. Mér hefur verið hótað því að ég verði drepinn,“ sagði Nasr í viðtali við mbl.is síðasta haust.
Bæði börnin fæddust í Þýskalandi og eru bæði ríkisfangslaus, enda hafa þau verið á flótta allt sitt líf. Foreldrarnir segja að samkvæmt siðum í Íran tilheyri börnin Evrópu af því að þar sé fæðingarland þeirra.
„Ef við förum aftur til Íran teljum við líklegt að hann [Leó] verði grýttur til dauða. Þau munu segja að hann sé trúlaus eða kristinn og eigi enga framtíð í Íran, eins og foreldrar hans,“ sagði Nasr síðasta haust. Hann bætti því við að fjölskyldan vildi bara lifa eðlilegu lífi en þau kunnu vel við sig hér á landi þann stutta tíma sem þau voru á landinu.
Nýtt fangelsi í landi Stóra-Hrauns tilbúið 2028
Líklega komin á seinni hluta hrinunnar í Svartsengi
Sólveig Anna furðar sig á aðferðum kennara
Hópur fólks reyndi að komast að eldgosinu
Hluti bílastæðis undir hraun: Ómögulegt að meta tjón
Yfir 300 stæði fóru undir hraun