Samtökin Jarðarvinir telja að eftirliti með skutulbyssum Hvals hf. sem notaðar eru við hvalveiðar virðist vera verulega ábótavant og hafa sent lögreglunni á Vesturlandi erindi þess efnis.

Jarðarvinir sendu lögreglustjóranum á höfuðborgarsvæðinu fyrirspurn varðandi skutulbyssurnar og í svari embættisins kemur fram að leyfi Hvals hf. fyrir byssunum finnist ekki í kerfi lögreglunnar. Um er að ræða tvær 90 mm Kongsbert-skutulbyssur, sem eru sérhannaðar til hvalveiða.

„Í tilefni af fyrirspurninni leitaði embætti LRH umræddra leyfa en þau fundust ekki á pappírsformi,“ segir í svari embættisins, sem bendir þó á að hafa verði í huga að skip fyrirtækisins komu til landsins árið 1964 og 1965 ásamt umræddum byssum og gætu þær því hafa verið skráðar í eldri spjaldskrárkerfum lögreglu en skráning þeirra misfarist í gagnaflutningi árið 2000 þegar núverandi skotvopnakerfi var tekið í notkun eftir samkeyrslu við eldri skrár.

Embætti ríkislögreglustjóra telur að skutulbyssur fyrirtækisins hafi verið fluttar til landsins á sínum tíma í samræmi við þágildandi lög og reglur og því hafa þær verið skráðar í rafræna skotvopnaskrá embættisins.

Svo virðist sem lítið eftirlit sé hins vegar með byssunum. Engin regluleg úttekt fer fram á vopnunum og hvorki Vinnueftirlitið né Samgöngustofa segja eftirlitið á þeirra ábyrgð, samkvæmt svari við fyrirspurn Jarðarvina.

Lögreglan á Vesturlandi er með hvalveiðar Hvals hf. til rannsóknar vegna kæru sem Jarðarvinir lögðu fram í byrjun ágúst vegna veiða fyrirtækisins á blendingshvölum. Jarðarvinir hafa nú sent embættinu viðbótargögn tengd skutulbyssunum.

Tengdar fréttir

Hvalveiðar

Mál Black Cube ekki á borði ríkissaksóknara

• Fjögur fyrirtæki sótt um leyfi til hvalveiða
• Fátt um svör vegna Black Cube
• „Er í mínum huga engin frétt“
• Ríkislögreglustjóri kannar málsatvik

» Fleiri tengdar fréttir

• Blogga um frétt