Hlýnun jarðar kallar á aukið samstarf

Alþjóðlegt vísindasamstarf er forsenda þess að unnt verði að skilja og bregðast við afleiðingum hlýnunar jarðar á umhverfi og samfélög á norðurslóðum. Þetta sagði Lilja Alfreðsdóttir mennta- og menningarmálaráðherra er hún ávarpaði gesti á þingi Hringborði norðursins, stendur nú yfir í Reykjavík.

Ræddi Lilja um mikilvægi vísindasamstarfs og rannsókna á norðurslóðum.  Sagði hún að til að meta til fulls þá margbrotnu félagslegu, menningarlegu og sögulegu þætti sem tengjast því stóra verkefni að aðlagast örum samfélags- og náttúrufarsbreytingum sé mikilvægt að horfa til þess mannauðs og þekkingar sem sé til staðar á hverju svæði fyrir sig.

„Í því felst til að mynda að efla þverfaglegar rannsóknir sem tengja sama hug- og félagsvísindi við raun- og náttúruvísindi. Með þeim hætti má stuðla að því að stefnumótun og ákvarðanataka sé byggð á heildrænni sýn og að tekið sé tillit til viðhorfa og þekkingar íbúa á viðkomandi svæðum,“ er haft eftir ráðherra í frétt á vef Stjórnarráðsins. „Þær áskoranir sem hlýnun jarðar hefur í för með sér kalla á aukið samstarf. Viðbrögð okkar við þessum áskorunum munu skipta miklu fyrir lífsgæði framtíðarinnar og því brýnt að stefnumótun ríkja á svæðinu byggi á gagnreyndri þekkingu, yfirsýn og góðri samvinnu.“

Þá lagði ráðherra sérstaka áherslu á mikilvægi þess íbúar á norðurslóðum taki virkan þátt í ákvarðanatöku um mál er þeim tengjast, sem og aðkomu þeirra að vísindarannsóknum á svæðunum.

Þingi Hringborðs norðursins lýkur á morgun, en það sækja um 2.000 þátttakendur frá rúmlega 50 löndum, þar á meðal ráðherrar, vísindamenn, sérfræðingar, forystumenn í atvinnulífi, háttsettir embættismenn og leiðtogar frumbyggja og umhverfissamtaka. 

• Blogga um frétt