Barnaníðsefni og eggvopn fundust á heimili hjónanna

Eggvopn og barnaníðsefni fundust á heimili hjóna sem grunuð eru um gróf kynferðisbrot gegn dóttur sinni og stjúpdóttur. Fyrirtaka í máli hjónanna fer fram 5. nóvember en ákæra á hendur þeim var þingfest í Héraðsdómi Reykjaness í dag.

Frétt af mbl.is

Fyrirtaka í máli hjóna í nóvember

Í ákærunni, sem RÚV hefur fengið afhenta, er maðurinn sagður hafa nauðgað stjúpdóttur sinni í félagi við móður hennar auk þess að taka hreyfi- og ljósmyndir af brotunum og þannig framleitt myndefni sem sýnir barnið á kynferðislegan hátt. Í ákærunni kemur einnig fram að móðirin er sögð hafa veitt dóttur sinni áfengi meðan á brotunum stóð.

Hjónin eru einnig ákærð fyrir brot gegn dóttur sinni og í ákærunni eru þau sögð hafa framið brotin að henni viðstaddri. Á dóttirin að hafa horft á brotin gegn systur sinni og með því eru hjónin sögð hafa ógnað velferð stúlkunnar á alvarlegan hátt.

Þá er maðurinn ákærður fyrir kynferðisbrot með því að hafa í vörslu sinni á heimilinu 807 ljósmyndir og 29 myndskeið sem sýna börnin á kynferðislegan hátt. Einnig er hann ákærður fyrir brot á vopnalögum þar sem á heimili hjónanna fannst mikið af eggvopnum, meðal annars 50 sentimetra langt sverð, butterfly-hnífur, tveir stunguhnífar, kasthnífur og slöngubyssa.

Kol­brún Bene­dikts­dótt­ir vara­héraðssak­sókn­ari sagði að hjón­in hefðu játað brot sín að hluta en gat ekk­ert tjáð sig frek­ar um málið þegar blaðamaður mbl.is ræddi við hana fyr­ir utan dómsal­inn í dag. Líkt og fyrr segir fer fyrirtaka í málinu fram 5. nóvember.

• Blogga um frétt