Jöfnuður á Íslandi aukist síðustu ár

Jöfnuður á Íslandi, hvort heldur horft er til eigna eða tekna, hefur aukist á undanförnum árum. Þetta er niðurstaða greiningar Samtaka atvinnulífsins.

Við greininguna var meðal annars stuðst við opinber gögn og greiningu bankans Credit Suisse, að því er fram kemur í umfjöllun um mál þetta í Morgunblaðinu í dag.

Leiðir greiningin í ljós að jöfnuður tekna hefur aukist, samkvæmt Gini-stuðlinum. Meðal annars hafi meðallaun efstu tekjutíundarinnar hækkað minna undanfarin ár en allra hinna og jöfnuður því aukist.

Á sama hátt hafi eignaójöfnuður verið minni á Íslandi árið 2016 en árið 2007. Til dæmis bendi greining Credit Suisse til að hlutdeild efstu tíundar af hreinum heildareignum á Íslandi sé sú minnsta á Norðurlöndum.