Langtímaveikindi kosta borgina milljarða

Á árunum 2009-2017 varði Reykjavíkurborg samtals um 5,3 milljörðum (miðað við verðlag 2018) í langtímaveikindi starfsmanna, aðeins á skóla- og frístundasviði. Þetta kom fram í svari sviðsins við fyrirspurn Sósíalistaflokks á fundi borgarráðs á fimmtudag.

Útgjöld þessi hafa aukist hér um bil jafnt og þétt frá því 2009. Árið 2009 fóru um 280 milljónir í málaflokkinn (508 milljónir miðað við verðlag 2018) en árið 2017 voru það 650 milljónir.

Á fyrstu sex mánuðum ársins 2018 nam kostnaðurinn 357 milljónum, 62 milljónum umfram fjárheimild á því tímabili. Ef næstu sex mánuðir eru eins verður kostnaðurinn um 700 milljónir fyrir 2018.

Á fimmtudaginn lagði mannauðsdeild Reykjavíkurborgar fram svar við fyrirspurn Sósíalistaflokks um þessi mál. Í fyrirspurninni var spurt út í hver útgjöldin í þessum málaflokki hafi verið og jafnframt spurningum velt fram um mögulegar ástæður fyrir þessum síauknu útgjöldum.

Svarað fyrir gríðarleg útgjöld

Mannauðsdeild borgarinnar svaraði með því að tína til ýmis átök sem deildin hefur ráðist í á undanförnum árum til að bæta heilsu starfsfólks almennt. Þá hengdi hún við öllu lengri umsögn frá sjálfu skóla- og frístundasviði, sem útlistar hvernig tekið er á svona málum innan þess sviðs.

Skóla- og frístundasvið segir í þeirri umsögn að mikil vinna hafi þegar átt sér stað til að sporna við þessari þróun. Í því sambandi er lögð áhersla á innleiðingu QlikView-viðverukerfis, sem gefur nákvæmari gögn um viðveru starfsfólks. Ekki er þó að sjá að útgjöld vegna langtímaveikinda hafi minnkað frá innleiðingu þess kerfis.

Þá er gengist við því í skýrslunni að af starfsmönnum Reykjavíkurborgar eru einna óánægðastir í starfi þeir sem vinna á skóla- og frístundasviði. Fyrr á þessu ári mældist sviðið með 3,46 af 5 mögulegum í könnun meðal starfsfólks. Aðeins tvö svið borgarinnar fá lægri einkunn.

• Blogga um frétt