Vilja leyfa skemmtanir á helgidögum

Í samráðsgátt stjórnvalda er nú að finna drög að frumvarpi frá dómsmálaráðuneytinu, sem kveður á um að fella niður ákvæði laga um helgidagafrið sem banna tiltekna þjónustu, skemmtanir og afþreyingu á helgidögum þjóðkirkjunnar.

Með frumvarpinu verður þeim sem vilja veita þjónustu eða stunda afþreyingu á helgidögum þjóðkirkjunnar gert það kleift, en um það hefur verið fjallað mörg undanfarin ár að lög um helgidagafrið séu barn síns tíma. Þingflokkur Pírata lagði til fyrr á þessu ári að lögin yrðu felld á brott með öllu.

Skemmtanir á borð við dansleiki hafa verið bannaðar á helgidögum kirkjunnar og jafnvel hefur verið bannað samkvæmt laganna bókstaf að halda bingó eða happadrætti á þessum dögum. Einhverjir hafa reynt að fara í kringum þessi lög og skemmst er þess að minnast að síðustu páska var boðið upp á „drepleiðinlega dagskrá“ á viskíbar í miðborg Reykjavíkur á föstudaginn langa.

Samkvæmt frumvarpsdrögunum verður upptalning á helgidögum þjóðkirkjunnar færð yfir í þjóðkirkjulög, en í lögum um helgidagafrið verður þó enn ákvæði um að óheimilt sé að trufla guðsþjónustur, kirkjulegar athafnir eða annað helgihald með hávaða eða öðru því sem andstætt er helgi viðkomandi athafnar.

• Blogga um frétt