Slökkvistarfi á Akureyri lokið

Slökkvistarfi er lokið á Akureyri en þar kviknaði í fjölbýlishúsi við Strandgötu um klukkan hálf tvö í dag. Einn íbúi var fluttur á sjúkrahús vegna gruns um reykeitrun en fjórar íbúðir eru í húsinu.

Ólafur Stefánsson, slökkviliðsstjóri á Akureyri, segir að slökkviliðið sé nýbúið að afhenda lögreglu vettvanginn eftir að hafa vaktað húsið seinni partinn.

Slökkviliðsmenn að störfum í dag. mbl.is/Þorgeir

„Þetta var mikill eldur,“ segir Ólafur en hann var að mestu leyti staðbundinn við eina íbúð af fjórum. Mikill hiti og eldur var á efri hæð þeirrar íbúðir og öll íbúðin full af reyk. Auk þess var kominn reykur í aðrar íbúðir.

Frétt af mbl.is

Eldur í fjölbýlishúsi á Akureyri

Ólafur segir að helsta vandamálið við slökkvistarfið hafi verið eldurinn á efstu hæðum hússins. Gera þurfti gat á þak til að slökkva í glæðum og auðvelda vinnu við reykræstingu.

Ekki er hægt að segja til um eldsupptök á þessari stundu.

• Blogga um frétt