Innlent | mbl | 22.11.2018 | 6:02

Almannahagsmunir að hann gangi ekki laus

Héraðssaksóknari hefur gefið út ákæru á hendur karlmanni fyrir hrottalegar líkamsárásir. mbl.is/Ófeigur Lýðsson

Landsréttur hefur staðfest framlengingu á gæsluvarðhaldi yfir manni sem grunaður er um alvarlega líkamsárás á dyravörð á skemmtistaðnum Shooters, 26. ágúst, til 14. desember.

Héraðssaksóknari hefur höfðað sakamál yfir manninum fyrir tvær líkamsárásir á og framan við skemmtistaðinn Shooters. Samkvæmt ákærunni er manninum gefin að sök sérstaklega hættuleg líkamsárás við nafngreindan mann og tvo óþekkta menn með því að hafa veist með ofbeldi að dyraverði á staðnum og veitt honum ítrekuð hnefahögg í andlit, höfuð og líkama, sparkað ítrekað í líkama hans og þrjú hnéspörk í andlit auk þess að hafa haldið dyraverðinum og togað í hann þannig að hann komst ekki undan.

Jafnframt er árásarmanninum gefin að sök stórfelld líkamsárás gagnvart félaga hans, með því að hafa veitt honum hnefahögg í andlit, elt hann er maðurinn reyndi að komast undan og hrint honum þannig að dyravörðurinn féll fram fyrir sig, niður tvö þrep, höfuð hans skollið á hurð og hann fallið á magann á gólfið. Eins að hafa veitt honum nokkur hnefahögg og spörk í andlit þar sem dyravörðurinn lá. Dyravörðurinn hlaut við ofbeldið áverka á mænu, margþætt brot í fimmta hryggjarlið og er lamaður fyrir neðan háls.

Er það mat ákæruvaldsins að maðurinn, sem situr í gæsluvarðhaldi, sé undir sterkum grun um að hafa gengið í skrokk á báðum mönnunum og ef hann verður fundinn sekur á hann yfir höfði sér allt að 16 ára fangelsi. Jafnframt sé nauðsynlegt með tilliti til almannahagsmuna að honum sé haldið í gæsluvarðhaldi.

Dómurinn fellst á þetta með ákæruvaldinu og telur engin rök hníga til þess að gæsluvarðhaldi ákærða verði markaður skemmri tími. Ekkert hafi breyst frá því Landsréttur staðfesti fyrri gæsluvarðhaldsúrskurði yfir manninum.